AQSH prezidenti Jo Baydenning Delaver shtati Uilmington shahridagi uyidan “maxfiy” belgili besh sahifali hujjat topildi va Adliya vazirligiga topshirildi. Bu haqda Deutsche Welle xabar berdi.
Baydenning huquqiy masalalar bo‘yicha maxsus maslahatchisi Richard Zauber bu bo‘yicha ma’lumot bergan. U 12-yanvar kuni maxfiy hujjatni Adliya vazirligiga topshirishda yordam berish uchun prezidentning Vilmingtondagi uyiga borganini aytgan
“Hujjatni men bilan birga bo‘lgan Adliya vazirligi xodimlariga topshirayotganimda, unga ilova qilingan materiallar orasidan yana beshta maxfiy varaq, jami olti varaq hujjat bor edi”, — deydi Zauber.
Bir necha kun avval Baydenning shaxsiy kabinetida 2009-yildan 2017-yilgacha AQSH vitse-prezidenti lavozimida ishlagan davriga oid maxfiy davlat hujjatlari topilgani ma’lum bo‘ldi. CNN 9-yanvar kuni xabar qilganidek, gap maxfiylikning eng yuqori darajasidagi hujjatlar haqida bormoqda.
2022-yil noyabr oyida Baydenning advokatlari Vashingtondagi diplomatiya va global hamkorlik markazining qulflangan kabinetida o‘nga yaqin maxfiy hujjatlarni topgan. Ular orasida Amerika razvedkasi hamda Ukraina, Eron va Buyuk Britaniyaga oid brifing materiallari bo’lgan. Oq uy Bayden ma’muriyatda ishlamagani, 2017-yildan 2020-yilgacha Vashingtondagi belgilangan binolardan foydalanganini tan olgan. Prezidentning o‘zi ishxonasidan topilgan maxfiy hujjatlardan hayratga tushganini va ularning mazmunini bilmasligini aytgan.
13-yanvar kuni Baydenning garajda saqlanadigan shaxsiy va siyosiy hujjatlar orasida Obama ma’muriyatiga oid bir qancha maxfiy hujjatlar aniqlandi. Garajga tutash xonada hujjatning yana bir sahifasi topilgan.
Izoh (0)