Rossiya prezidentining sobiq maslahatchisi va iqtisodchi Andrey Illarionov 13-yanvar kuni bloger Aleksandr Shelestga bergan intervyusida Rossiya butun Ukrainani qamrab oladigan yangi hujumni boshlashni rejalashtirayotganini aytdi.
Uning so‘zlariga ko‘ra, Kreml bunga 4 oydan beri tayyorgarlik ko‘rgan. Illarionov 15-yanvardan boshlab Kreml Ukrainaga hujum rejalarini amalga oshirishni boshlashi mumkinligidan ogohlantirgan. U shu kuni Moskva qo‘shimcha safarbarlik e’lon qilishi mumkinligini ta’kidlagan. Qo‘shinlar guruhini million kishiga yetkazish prognoz qilinmoqda.
“Katta urush”ga tayyorgarlik belgilari
Illarionov 17-sentabrdan boshlab Rossiya armiyasi yangi, kattaroq harbiy harakatlarga tayyorgarlik boshlaganini aytdi. Rossiyaning katta hujumga tayyorlanayotganiga dalillardan biri bu qurolli kuchlardagi yo‘qotishlar soniga bog‘liq. So‘nggi 3-4 oy ichida ularning soni sezilarli darajada oshgan. Shuningdek, 300 mingdan ortiq odam safarbar etilgan.
Rossiya qo‘shinlarining hozirgi guruhi 600-700 ming kishini tashkil etadi va armiya ilgari ishlatilmagan yangi turdagi qurollardan foydalanadi. Siyosatchi ular qatorida Atlantika va Hind okeani, shuningdek, O‘rta Yer dengizi orqali o‘tadigan “Admiral Gorshkov” kemasidagi “Sirkon” gipertovushli raketalarini nazarda tutgan.
15-dekabr kuni Vladimir Putin yig‘ilish o‘tkazib, unda go‘yoki “katta urush” haqida qaror qabul qilgani aytiladi.
“Putin va Rossiya rahbariyatining yuqori rahbari, Rossiya Bosh shtabi 24 soat, tinimsiz ishlamoqda. Putin har kuni harbiylar bilan uchrashadi”, — deydi Rossiya prezidenti sobiq maslahatchisi.
Illarionovning so‘zlariga ko‘ra, Putin Ukrainaga hujum uchun quyidagi sohalarda yangi o‘rinbosarlar tayinlaydi:
- General Sergey Surovikin — Donbassda;
- General Oleg Salyukov — Belarus tomondan;
- General-polkovnik Aleksey Kim — Qrim—Zaporojye yo‘nalishidan.
Illarionovning ta’kidlashicha, Putin Ukrainaga Belarus hududidan Lvovgacha G‘arb qurollarini yetkazib berish liniyalarini uzib qo‘yish uchun hujum qilmoqchi. Bu asosiy zarba yo‘nalishi bo‘ladi.
“Rossiya bosh shtabdagi operatsiya ‘katta Stalingrad’ deb nomlanadi. Ukraina qo‘shinlarining qurshovga olinishi kutilmoqda. Ammo hozirda operatsiya boshqa yo‘nalishda bo‘ladi. Qamal qilish Ukrainaning eng g‘arbiy chegaralari bo‘ylab amalga oshishi rejalashtirilgan”, — deydi Illarionov.
Kiyev asosiy nishon bo‘lmaydi
“Kiyevga hujum qilish mumkin, ammo, nazarimda, bu chalg‘ituvchi xarakterga ega bo‘ladi”, — dedi Illarionov. Keng ko‘lamli urush boshlanishidagi voqealar poytaxtni kuchli guruh egallab ololmasligini ko‘rsatgan. Nega G‘arb razvedkasi bunday yirik hujum haqida hech narsa bildirmayapti, degan savolga Illarionov ular bu haqda bilmasligini yoki “qo‘rqitmaslik uchun” jim turishini aytdi.
Andrey Illarionov kim?
Andrey Illarionov rossiyalik iqtisodchi va siyosatchi. 2000-yildan 2005-yilgacha u Vladimir Putinning iqtisodiyot bo‘yicha maslahatchisi bo‘lgan. U Rossiya prezidentining bir qator qarorlariga rozi bo‘lmagani uchun iste’foga chiqqan. 2005-yildan keyin Illarionov Putinga muxolifatchi siyosatchiga aylangan. 2014-yilda, Rossiya bosqinining boshlanishidan sal oldin, u Qrim va Ukraina sharqini anneksiya qilish rejalari haqida ogohlantirgan. 2021-yilda u G‘arb Moskva tomoniga o‘tganini aytib, AQSH prezidenti Jo Bayden va Putin o‘rtasidagi muzokaralarni “Myunxen kelishuvi” bilan solishtirgan. Buning uchun u bir qator jurnalistlar tomonidan tanqid qilingan.
Izoh (0)