Rossiyalik oligarx Alisher Usmonovga tegishli Irina VU yaxtasi Xorvatiya hududini sanksiyalarga qaramay bemalol tark etgani aniqlandi. Bu haqda mahalliy Jutarnji nashri xabar berdi.
Ma’lum qilinishicha, yaxta Rossiyaning musodara qilingan mulklari ro‘yxatiga kiritilgan. Shu sababli yaxtaning harakatlanishi yuzasidan munozara kelib chiqqan. Xorvatiya rasmiylari Irina VU Murter orolidagi Betina marinasining to‘xtash joyini uch oy oldin tark etganini aniqlagan.
2022-yil 6-oktabrda yaxta Betinani tark etganini ochiq manbalardan bilib olish mumkin. 9-oktabr kuni u Turkiyaning Didim portiga yetib kelgan va u yerda langar qoldirgan. Bu yaxtaning oxirgi manzili ekani aytilmoqda. Yaqin kunlarda Irina VU bilan deyarli bir xil kema Betinaga suzib kelgan. Jurnalistlarning manbasiga ko‘ra, bu Alisher Usmonov yaxtasining Xorvatiyada ekaniga ishora qilish uchun amalga oshirilgan. Biroq rasmiylar buni tasodif deb atamoqda.
OAV xabarlariga ko‘ra, Irina VUni olib ketishga muvaffaq bo‘lingan, chunki Xorvatiya chegara politsiyasida kemaning harakatlanishi taqiqlangani haqida ma’lumot bo‘lmagan. Dengiz, transport va infratuzilma vazirligi shtat kotibi Alen Gospochichning aytishicha, Usmonov sanksiyalarga uchraganida yaxta muhrlangan. Port kapitani unga kirishni taqiqlagan va egalari yaxta musodara qilinishidan ogohlantirilgan. Biroq Betina bepul kirish huquqiga ega ochiq marina, shu uchun port xavfsizligi ta’minlanmagan.
“Vazirlik portga yaxta hibsga olingani haqida xabar bergan, port kapitani hukumatga yaxtaga har qanday tarzda kirish taqiqlangani bo‘yicha tegishli ko‘rsatma bergan. Vazirlik esa portdagi mulklarni kecha-yu kunduz qo‘riqlash uchun xavfsizlik xizmatlarini yollamaydi va buni rejalashtirmaydi, chunki bunday tizim hayotiy emas”, — deydi Gospochich.
Davlat kotibi nima uchun yaxta joyidan qo‘zg‘algani uch oydan keyin aniqlanganiga ham javob bergan. Unga ko‘ra, vazirlik vazifalariga “muzlatilgan” mulkni tekshirish kirmaydi. Xorvatiya xavfsizlik xizmatlari xalqaro tergovchilar bilan hamkorlikda shov-shuvli voqeani tekshirishga kirishdi.
Izoh (0)