Ukrainadagi urush doirasida Rossiya chet el fuqarolarini shartnoma bo‘yicha harbiy xizmat o‘tashini rag‘batlantirib, ularga soddalashtirilgan tartibda Rossiya fuqaroligini olish imkoniyatini bermoqda. Bu haqda Rossiya Tergov qo‘mitasi rahbari Aleksandr Bastrikin “Rossiyskaya gazeta”ga bergan intervyusida ma’lum qildi.
Uning so‘zlariga ko‘ra, Rossiya fuqaroligini olish orqali muhojirlar nafaqat huquqlarni, balki amaldagi qonunchilikda belgilangan majburiyatlarni ham oladi. Ulardan biri Rossiya Qurolli kuchlari talablariga muvofiq harbiy xizmatni o‘tashdir.
Bastrikin statistik ma’lumotlarga to‘xtalib, chet elliklar harbiy xizmatni chetlab o‘tib, ommaviy ravishda Rossiya fuqaroligini olayotganini aytdi. Oxirgi besh yil ichida Markaziy Osiyo va Kavkaz davlatlaridan kelgan milliondan ortiq kishi, jumladan, Tojikiston, O‘zbekiston va Qirg‘izistondan 550 ming kishi Rossiya fuqaroligini olganini qayd etdi.
“2022-yilning birinchi yarmida yuqorida ko‘rsatilgan davlatlarning 60 mingdan ortiq voyaga yetgan fuqarolari Rossiya fuqaroligini oldi. Shuning uchun ular mamlakatni himoya qilishning konstitutsiyaviy majburiyatini ham olgan. Shu munosabat bilan, fuqarolikka qabul qilingan shaxslarning maxsus harbiy operatsiya vazifalarini amalga oshirishda ishtirok etishi masalasini ko‘rib chiqish maqsadga muvofiqdir”, — dedi Aleksandr Bastrikin.
Eslatib o‘tamiz, O‘zbekiston Jinoyat kodeksining 154-1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi ko‘zda tutilgan.
Mavzuga doir: Rossiyadagi o‘zbekistonlik mahbuslar Ukrainadagi urushga yollanayotgani haqida ma’lumot berildi
Izoh (0)