АҚШ президенти Жо Байденнинг Делавер штати Уилмингтон шаҳридаги уйидан «махфий» белгили беш саҳифали ҳужжат топилди ва Адлия вазирлигига топширилди. Бу ҳақда Deutsche Welle хабар берди.
Байденнинг ҳуқуқий масалалар бўйича махсус маслаҳатчиси Ричард Заубер бу бўйича маълумот берган. У 12 январь куни махфий ҳужжатни Адлия вазирлигига топширишда ёрдам бериш учун президентнинг Вилмингтондаги уйига борганини айтган
«Ҳужжатни мен билан бирга бўлган Адлия вазирлиги ходимларига топшираётганимда, унга илова қилинган материаллар орасидан яна бешта махфий варақ, жами олти варақ ҳужжат бор эди», — дейди Заубер.
Бир неча кун аввал Байденнинг шахсий кабинетида 2009 йилдан 2017 йилгача АҚШ вице-президенти лавозимида ишлаган даврига оид махфий давлат ҳужжатлари топилгани маълум бўлди. CNN 9 январь куни хабар қилганидек, гап махфийликнинг энг юқори даражасидаги ҳужжатлар ҳақида бормоқда.
2022 йил ноябрь ойида Байденнинг адвокатлари Вашингтондаги дипломатия ва глобал ҳамкорлик марказининг қулфланган кабинетида ўнга яқин махфий ҳужжатларни топган. Улар орасида Америка разведкаси ҳамда Украина, Эрон ва Буюк Британияга оид брифинг материаллари бўлган. Оқ уй Байден маъмуриятда ишламагани, 2017 йилдан 2020 йилгача Вашингтондаги белгиланган бинолардан фойдаланганини тан олган. Президентнинг ўзи ишхонасидан топилган махфий ҳужжатлардан ҳайратга тушганини ва уларнинг мазмунини билмаслигини айтган.
13 январь куни Байденнинг гаражда сақланадиган шахсий ва сиёсий ҳужжатлар орасида Обама маъмуриятига оид бир қанча махфий ҳужжатлар аниқланди. Гаражга туташ хонада ҳужжатнинг яна бир саҳифаси топилган.
Изоҳ (0)