12-yanvar kuni Toshkent shahar hokimligi tomonidan aholiga to‘yxonalarda bepul osh tarqatish boshlandi.
Hokimlikning xabar qilishicha, bu hayrli ish poytaxtda kuzatilayotgan anomal sovuq havo sababli amalga oshirilmoqda.
16-yanvargacha davom etadigan bepul osh tarqatish tadbirlariga kam ta’minlangan oilalar, Uy-joy kommunal xizmat ko‘rsatish sohasi, Obodonlashtirish boshqarmasi hamda Yo‘l harakati xavfsizligi xodimlari taklif qilingan.
“Daryo” muxbiri bugun (13-yanvar) Mirzo Ulug‘bek tumanidagi “Ezidiyor” to‘yxonasida bo‘lib, osh tarqatish jarayonidan reportaj tayyorladi.
Aytilishicha, to‘yxonada tushlik vaqtiga 100 kilo osh damlangan. Yoshlar ishlari agentligi vakili Mahmudjon Payziyevning aytishicha, tumanda osh ikkita to‘yxonada tarqatilyapti.
“Bu tadbirni o‘tkazishdan maqsadimiz anomal sovuq bo‘lishiga qaramasdan ko‘chada xizmat qilayotgan aholiga mehr va yaxshi kayfiyat ulashishdan iborat. Odamlar bu ishimizdan xursand bo‘lmoqda. Mirzo Ulug‘bek tumanida ikkita to‘yxonada bepul osh tarqatilyapti. Faollar tumandagi kam ta’minlangan bemor insonlar uchun oshlarni ularning uylariga olib borib bermoqda”, – deydi u.
Izoh (0)