“Afrosiyob” poyezdining Toshkent—Buxoro—Toshkent yo‘nalishida qatnovchi uchta reysi bekor qilindi. Bu haqda “O‘ztemiryo‘lyo‘lovchi” matbuot xizmati xabar qildi.
Qayd etilishicha, O‘zbekistonda kuzatilayotgan anomal sovuq ob-havo tufayli, yo‘lovchi poyezdlar harakat havfsizligini ta’minlash va yo‘lovchilarni o‘z manzillariga yetkazish davomida noqulayliklar kelib chiqishini oldini olish maqsadida ushbu yo‘nalishda 13, 14, 15-yanvar kunlari amalga oshirilishi lozim bo‘lgan 3 ta reys bekor qilinadi.
Yo‘lovchilar o‘z manzillariga yetib olish maqsadida quyidagi muqobil yo‘lovchi poyezdlardan foydalanishi mumkin:
- 12-sonli Toshkent—Buxoro (“Sharq”);
- 56-sonli Toshkent—Buxoro–Xiva;
- 58-sonli Toshkent—Buxoro—Shovot;
- 72-sonli Toshkent—Buxoro—Olot;
- 125-sonli Andijon—Toshkent—Buxoro—Xiva.
13-yanvar kuni Buxoro—Toshkent yo‘nalishidagi 765-sonli yuqori tezlikda harakatlanuvchi elektropoyezdda anomal sovuq ob-havo sababli nosozlik yuzaga kelib, to‘xtab qolgandi. Yo‘lovchilarni manzilga xavfsiz yetkazib kelish maqsadida zaxira “Afrosiyob” elektropoyezdi jo‘natilgandi. “O‘ztemiryo‘lyo‘lovchi” matbuot xizmati xavfsizlikni ta’minlash maqsadida poyezdlar harakat jadvaliga o‘zgartirishlar kiritilishini ma’lum qilgandi.