12 январь куни Тошкент шаҳар ҳокимлиги томонидан аҳолига тўйхоналарда бепул ош тарқатиш бошланди.
Ҳокимликнинг хабар қилишича, бу ҳайрли иш пойтахтда кузатилаётган аномал совуқ ҳаво сабабли амалга оширилмоқда.
16 январгача давом этадиган бепул ош тарқатиш тадбирларига кам таъминланган оилалар, Уй-жой коммунал хизмат кўрсатиш соҳаси, Ободонлаштириш бошқармаси ҳамда Йўл ҳаракати хавфсизлиги ходимлари таклиф қилинган.
«Дарё» мухбири бугун (13 январь) Мирзо Улуғбек туманидаги «Эзидиёр» тўйхонасида бўлиб, ош тарқатиш жараёнидан репортаж тайёрлади.
Айтилишича, тўйхонада тушлик вақтига 100 кило ош дамланган. Ёшлар ишлари агентлиги вакили Маҳмуджон Пайзиевнинг айтишича, туманда ош иккита тўйхонада тарқатиляпти.
«Бу тадбирни ўтказишдан мақсадимиз аномал совуқ бўлишига қарамасдан кўчада хизмат қилаётган аҳолига меҳр ва яхши кайфият улашишдан иборат. Одамлар бу ишимиздан хурсанд бўлмоқда. Мирзо Улуғбек туманида иккита тўйхонада бепул ош тарқатиляпти. Фаоллар тумандаги кам таъминланган бемор инсонлар учун ошларни уларнинг уйларига олиб бориб бермоқда», – дейди у.
Изоҳ (0)