Buxoro shahrida 1,3 milliard so‘m kredit mablag‘ini o‘zlashtirgan korxona rahbari aniqlandi, deb xabar bermoqda Bosh prokuratura huzuridagi departament.
Departamentning Buxoro shahar bo‘limi tomonidan o‘tkazilgan tergovga qadar tekshiruvda, “T.N.” oilaviy korxonasi rahbari F.G. hududiy tijorat banki filialining sobiq mas’ul shaxslari bilan o‘zaro til biriktirib, korxonaga 2019-yilda ajratilgan kredit ta’minoti uchun garovga qo‘yilgan mehmonxona binosini qayta garovga qo‘yib, sun’iy ravishda qimmat narxda baholatgani aniqlangan.
Bundan tashqari, qo‘shimcha bino qurish uchun yana 900 million so‘m kredit ajratilishiga erishib, bank filialining jami 1,3 milliard so‘m kredit mablag‘ini o‘zlashtirish va rastrata qilish yo‘li bilan talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 205-moddasi (hokimiyat yoki mansab vakolatini suiiste’mol qilish) bilan jinoyat ishi qo‘zg‘atilib, tergov harakatlari olib borilmoqda.
Mavzuga doir: O‘zini bank xodimi deb tanishtirib, farg‘onalik fuqaroni 12,4 mln so‘mga chuv tushirgan shaxs ushlandi
Izoh (0)