Rim shahridagi O‘zbekiston diplomatiya vakolatxonasida Italiya qishloq xo‘jaligi uyushmasi prezidenti Janfranko Grechi bilan uchrashuv bo‘lib o‘tdi, deb xabar bermoqda “Dunyo” axborot agentligi.
Qayd etilishicha, Janfranko Grechi O‘zbekiston qishloq xo‘jaligi vazirligi bilan o‘rnatilgan aloqalarni qadrlashini bildirgan. 2022-yilda vakolatxona ko‘magida qator delegatsiyalar bilan samarali muloqot olib borilganini ta’kidlagan.
Janfranko Grechi, shuningdek, Italiya qishloq xo‘jaligi vazirligi va uyushma yetakchiligida joriy yil may oyida Neapol shahrida o‘tkaziladigan “II Mediterraneo Wine&Food and Travel” oziq-ovqat xalqaro ko‘rgazmasiga tayyorgarlik ishlari boshlanganini ma’lum qilgan.
“Ushbu ko‘rgazmada Lotin Amerikasi, Yevropa va Yaqin Sharq mintaqasidan 20 dan ortiq davlatning ishtirok etishi rejalashtirilmoqda. Tadbirda turli mamlakatlarning oziq-ovqat mahsulotlari namoyish qilinishi bilan birga yuqori darajadagi rasmiy uchrashuvlarni o‘tkazish ham nazarda tutilmoqda. Bugungi kunda ko‘rgazma konsepsiyasi ishlab chiqilmoqda. Ushbu xalqaro tadbir O‘zbekiston qishloq xo‘jaligi mahsulotlarini dunyoga yanada yaqindan tanitish, shuningdek, Italiya qishloq xo‘jaligi sohasi vakillari bilan o‘zaro aloqalarni mustahkamlash uchun yaxshi imkoniyat bo‘lishi mumkin”, — dedi Janfranko Grechi.
Uchrashuv yakunida Neapol shahrida bo‘lib o‘tadigan “II Mediterraneo Wine&Food and Travel” oziq-ovqat xalqaro ko‘rgazmasida O‘zbekiston vakillarining ishtirokini puxta ishlab chiqishga kelishib olingan.
Izoh (0)