Buxoroda 35 yoshli ayol o‘ziga shilqimlik qilgan mast tanishini pichoqlab qo‘ydi

Buxoro viloyati Kogon shahrida 2-yanvar kuni ayol mast holda tanishiga pichoq bilan og‘ir jarohat yetkazdi. Bu haqda Tergov departamenti xabar qildi.

Qayd etilishicha, shu kuni tungi soat 00:52 larda N.E. (erkak, 40 yoshli) Kogon shahar Madaniyat ko‘chasida yashovchi tanishi R.N.ning (ayol, 35 yoshli) uyiga kelib, u bilan spirtli ichimlik iste’mol qilgan. Mast holda o‘zaro kelishmovchilik sababli janjallashib qolishib, ayol jahl ustida qo‘lida bo‘lgan oshxona pichog‘i bilan N.E.ni qorin sohasiga bir marotaba urib, og‘ir tan jarohati yetkazgan.

Oqibatda N.E. olgan tan jarohatlari bilan Kogon shahar tibbiyot birlashmasiga yotqizilgan.

Tergov davomida jinoyatning kelib chiqish sababi o‘rganilganda shu kuni jabrlanuvchi mast holatda gumonlanuvchi R.N.ning yashash xonadoniga o‘zi bilan olib kelgan aroqni iste’mol qilganini aytgan. So‘ng jabrlanuvchi fuqaro R.N.ga shilqimlik qilgan, shu bois o‘zaro janjallashib qolishib, bir-birini haqorat qilishgan. Shu payt qo‘shni xonada bo‘lgan R.N.ning shar’iy turmush o‘rtog‘i M.S. mazkur holatni eshitib, xotinini himoya qilish maqsadida janjalga aralashgan, R.N. esa jahl ustida qo‘lida bo‘lgan oshxona pichog‘i bilan tanishi N.E.ning qorin sohasiga bir marotaba urib, jarohat yetkazgan.

Holat yuzasidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan. Hozirda tergov davom etmoqda.