Farg‘ona viloyatida psixotrop dori vositalarining noqonuniy savdosiga chek qo‘yildi. Bu haqda Ichki ishlar vazirligi xabar qildi.
Qayd etilishicha, giyohvandlik va psixotrop moddalarning noqonuniy muomalasiga qarshi kurashish boshqarmasi xodimlari murojaatga asosan tezkor tadbir o‘tkazgan. Unda 2022-yil dekabr oyida Farg‘ona viloyatida yashovchi fuqarolar Qirg‘iziston bilan chegara hududidagi viloyatlar orqali ko‘p miqdordagi psixotrop dori vositalarining kontrabandasi bilan shug‘ullanayotgani aniqlangan.
Tadbir davomida 1990, 1971, 1998-yillarda tug‘ilgan fuqarolar ishga jalb qilingan xaridorga 30 200 dona “Zardeks” dori vositalarini sotayotgan vaqtida ashyoviy dalillar bilan qo‘lga olingan.
Surishtiruv jarayonida 1990-yilda tug‘ilgan shaxs qalbaki dori vositalarini Namangan viloyatining Qirg‘iziston bilan chegara hudididan olib o‘tgani, so‘ngra 1971-yilda tug‘ilgan jinoiy sherigining Dang‘ara tumanidagi yashash uyiga olib kelib, saqlagani ma‘lum bo‘lgan.
Tadbirda qorabozordagi umumiy narxi 1 milliard 208 million so‘m bo‘lgan psixotrop vositalarning savdosiga chek qo‘yilgan.
Hozirda tezkor surishtiruv ishlari olib borilmoqda.
Izoh (0)