Eronda futbolchi Amir Nasr Ozodaniy norozilik namoyishlarida qatnashgani uchun 26 yillik qamoqqa hukm qilindi, avvalroq uning ism-sharifi o‘lim jazosiga mahkum etilganlar ro‘yxatiga kiritilgandi.
Iran Wire nashri ma’lumotlariga ko‘ra, futbolchi noyabrda hibsga olingan va o‘shanda u o‘lim jazosiga hukm qilingani aytilgan. Biroq jazo uchta ayblov bo‘yicha 26 yillik qamoqqa o‘zgartirilgan.
Ozodaniy mamlakat xavfsizligiga putur yetkazish maqsadida noqonuniy guruhlarda qatnashganlik va davlat xavfsizligiga qarshi qaratilgan jinoyatlar bo‘yicha til biriktirganlik va ularda ishtirok etganlik uchun besh yildan (jami o‘n yil) qamoq jazosi oldi.
Shuningdek, sportchi “muhorib” (Olloh taologa zid faoliyat)ga sheriklik qilishda aybdor deb topilgandi. Bu ayblov bo‘yicha esa u 16 yilga qamaldi.
Avvalroq Professional futbolchilar uyushmasi xalqaro federatsiyasi (FIFPro) Ozodaniy bilan bog‘liq vaziyat tufayli Eron hukumatiga murojaat qilib, unga nisbatan jazoni zudlik bilan bekor qilishga chaqirgan edi.
26 yoshli Ozodaniy 2022-yil yozidan buyon erkin agent hisoblanadi. Uning so‘nggi klubi “Iranjavan” bo‘lgan.
Eronda 17-sentabrdan beri davom etayotgan namoyishlarda 400 000 ga yaqin odam hibsga olindi. Sentabr oyining oxirida Eronda 22 yoshli Mahsa Amini hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlandi. Ular butun mamlakat bo‘ylab haligacha davom etmoqda. Namoyishlar kuch tuzilmalari tomonidan shafqatsizlik bilan bostirilmoqda.
Tartibsizliklar chog‘ida xavfsizlik xodimlari tomonidan 450 dan ortiq odam o‘ldirilgan.
Mahalliy matbuotning yozishicha, Tehron sudi allaqachon olti nafar namoyishchini o‘limga hukm qilgan. Mohsin Shekariy birinchi bo‘lib qatl etilgan. U “qo‘zg‘olon ko‘tarishda”, Tehrondagi asosiy yo‘lni to‘sib qo‘yishda va “Basij” qarshilik kuchlari a’zosi yordamida hujum qilishda ayblangan.
Izoh (0)