Эронда футболчи Амир Наср Озоданий норозилик намойишларида қатнашгани учун 26 йиллик қамоққа ҳукм қилинди, аввалроқ унинг исм-шарифи ўлим жазосига маҳкум этилганлар рўйхатига киритилганди.
Iran Wire нашри маълумотларига кўра, футболчи ноябрда ҳибсга олинган ва ўшанда у ўлим жазосига ҳукм қилингани айтилган. Бироқ жазо учта айблов бўйича 26 йиллик қамоққа ўзгартирилган.
Озоданий мамлакат хавфсизлигига путур етказиш мақсадида ноқонуний гуруҳларда қатнашганлик ва давлат хавфсизлигига қарши қаратилган жиноятлар бўйича тил бириктирганлик ва уларда иштирок этганлик учун беш йилдан (жами ўн йил) қамоқ жазоси олди.
Шунингдек, спортчи «муҳориб» (Оллоҳ таолога зид фаолият)га шериклик қилишда айбдор деб топилганди. Бу айблов бўйича эса у 16 йилга қамалди.
Аввалроқ Профессионал футболчилар уюшмаси халқаро федерацияси (FIFPro) Озоданий билан боғлиқ вазият туфайли Эрон ҳукуматига мурожаат қилиб, унга нисбатан жазони зудлик билан бекор қилишга чақирган эди.
26 ёшли Озоданий 2022 йил ёзидан буён эркин агент ҳисобланади. Унинг сўнгги клуби «Иранжаван» бўлган.
Эронда 17 сентябрдан бери давом этаётган намойишларда 400 000 га яқин одам ҳибсга олинди. Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Тартибсизликлар чоғида хавфсизлик ходимлари томонидан 450 дан ортиқ одам ўлдирилган.
Маҳаллий матбуотнинг ёзишича, Теҳрон суди аллақачон олти нафар намойишчини ўлимга ҳукм қилган. Моҳсин Шекарий биринчи бўлиб қатл этилган. У «қўзғолон кўтаришда», Теҳрондаги асосий йўлни тўсиб қўйишда ва «Басиж» қаршилик кучлари аъзоси ёрдамида ҳужум қилишда айбланган.
Изоҳ (0)