Tehronda sud hokimiyati bir necha oylardan buyon davom etayotgan norozilik namoyishlarida qatnashgan 400 kishini turli qamoq muddatlariga hukm qildi. Bu haqda Yaqin Sharq OAVlari xabar bermoqda.
“Tehron viloyatida tartibsizliklar haqidagi ish bo‘yicha eshituvlarda 160 kishi besh yildan o‘n yilgacha, 80 kishi — ikki yildan besh yilgacha, yana 160 kishi — ikki yilgacha muddatga qamaldi”, — dedi Tehron bosh prokurori Ali Alkasiy Mehr.
Eronda so‘nggi bir hafta ichida ikki kishi tartibsizliklarda qatnashib, xavfsizlik kuchlari xodimlariga hujum qilgani uchun qatl etildi.
Avvalroq Eron prezidenti Ibrohim Raisiy hukumat xavfsizlik xizmatlari xodimlarining o‘limiga sabab bo‘lgan xatti-harakatlarni amalga oshirgan namoyishchilar topilib, jazolanishini aytgandi. Raisiyning so‘zlariga ko‘ra, norozilik namoyishlarini qo‘llab-quvvatlayotgan G‘arb mamlakatlari “yangi qo‘shma urush” yordamida Eron jamoat tuzumiga putur yetkazishga uringan, ammo Eron xalqi bunga dosh bera olgan.
Eronda 17-sentabrdan beri davom etayotgan namoyishlarda 18 000 ga yaqin odam hibsga olindi. Hozirgacha olti kishi o‘limga hukm qilingani ma’lum. 469 nafar namoyishchi va 61 nafar xavfsizlik kuchlari a’zosi esa o‘ldirilgan.
Sentabr oyining oxirida Eronda 22 yoshli Mahsa Amini hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlandi. Ular butun mamlakat bo‘ylab haligacha davom etmoqda. Namoyishlar kuch tuzilmalari tomonidan shafqatsizlik bilan bostirilmoqda.
Tartibsizliklar oqibatida, Eron Milliy xavfsizlik kengashi ma’lumotlariga ko‘ra, allaqachon 200 dan ortiq odam halok bo‘lgan. Islom inqilobi posbonlari qo‘mondoni Serdar Gajizoda 300 nafar qurbon haqida, Iran Human Rights huquqni himoya qilish tashkiloti esa 448 nafar qurbon haqida ma’lum qilgan.
Eron oliy yetakchisi Ali Homeyniy avvalroq namoyishlar AQSH va Isroil tomonidan rejalashtirilganini aytgandi. Amerika prezidenti esa noyabrda Vashington “Eronni ozod qilishi” haqida gapirgandi. Bunga javoban, Raisiy Eron 43 yil avval — 1979-yilgi Islom inqilobi chog‘ida ozod etilganini ta’kidlagan.
Izoh (0)