Rossiya hududi, katta ehtimol bilan, yangi zarbalarga uchraydi, dedi Ukraina Mudofaa vazirligi Razvedka bosh boshqarmasi boshlig‘i Kirill Budanov ABC News’ga bergan intervyusida.
U jurnalistning yangi zarbalar bo‘lish-bo‘lmasligi haqidagi savoliga javoban: “Menimcha, ha, — dedi. — Rossiya hududiga tobora chuqurroq kirib boriladi”. Budanov bu hujumlar ortida Kiyev turish-turmasligiga aniqlik kiritmadi.
Iyun oyida Ukraina prezidenti Vladimir Zelenskiy G‘arbni Rossiyadagi nishonlarga hujum qilish uchun emas, balki himoya maqsadlarida uzoq masofali qurollar yetkazib berishga chaqirgandi, ammo ko‘p o‘tmay, Ukraina Milliy xavfsizlik va mudofaa kengashi kotibi Aleksey Danilov “zarur bo‘lgan taqdirda” Rossiya hududidagi harbiy obyektlarga zarbalar berilishi mumkinligini aytdi.
Dekabrda Danilov Ukrainaga zarbalar berish davom ettiradigan bo‘lsa, Kiyev Rossiyadagi nishonlarga hujum qilishga tayyorligini tasdiqladi. “Biz hamma narsaga qodir bo‘lamiz. Shuning uchun agar nimadir bizning manfaatlarimizga talluqli bo‘lsa, dushmanning qayeriga zarba berish haqida hech kimdan so‘rab o‘tirmaymiz”, — deya ta’kidladi u.
Rossiyaning chegara yaqinidagi hududlari muntazam o‘qqa tutiladi, sakkizta subyektda esa javob ko‘rsatishning o‘rtacha darajasi joriy qilingan.
Dekabr boshida Rossiya Mudofaa vazirligi Ukraina reaktivlar dronlar yordamida Ryazan viloyatidagi Dyagilevo va Saratov viloyatidagi Engels aerodromiga zarba berishga uringanini ma’lum qilgandi. Havo hujumiga qarshi mudofaa vositalari dronlarni tutib qolgan, biroq bo‘laklar ikkita samolyot korpusiga zarar yetkazgan, uch harbiy esa halok bo‘lgan.
Havo hujumiga qarshi mudofaa tizimi ishga tushgani haqida Sevastopol hukumati bir necha marta xabar bergan. Ukraina Qrim yarim orolini o‘z hududi deb hisoblaydi va, Budanov ta’kidlaganidek, u yerda “har qanday qurol”dan foydalana oladi. Dronlar Belbek aeroporti osmonida so‘nggi marta 4-yanvar kuni urib tushirilgan.
Izoh (0)