Россия ҳудуди, катта эҳтимол билан, янги зарбаларга учрайди, деди Украина Мудофаа вазирлиги Разведка бош бошқармаси бошлиғи Кирилл Буданов ABC News’га берган интервьюсида.
У журналистнинг янги зарбалар бўлиш-бўлмаслиги ҳақидаги саволига жавобан: «Менимча, ҳа, — деди. — Россия ҳудудига тобора чуқурроқ кириб борилади». Буданов бу ҳужумлар ортида Киев туриш-турмаслигига аниқлик киритмади.
Июнь ойида Украина президенти Владимир Зеленский Ғарбни Россиядаги нишонларга ҳужум қилиш учун эмас, балки ҳимоя мақсадларида узоқ масофали қуроллар етказиб беришга чақирганди, аммо кўп ўтмай, Украина Миллий хавфсизлик ва мудофаа кенгаши котиби Алексей Данилов «зарур бўлган тақдирда» Россия ҳудудидаги ҳарбий объектларга зарбалар берилиши мумкинлигини айтди.
Декабрда Данилов Украинага зарбалар бериш давом эттирадиган бўлса, Киев Россиядаги нишонларга ҳужум қилишга тайёрлигини тасдиқлади. «Биз ҳамма нарсага қодир бўламиз. Шунинг учун агар нимадир бизнинг манфаатларимизга таллуқли бўлса, душманнинг қаерига зарба бериш ҳақида ҳеч кимдан сўраб ўтирмаймиз», — дея таъкидлади у.
Россиянинг чегара яқинидаги ҳудудлари мунтазам ўққа тутилади, саккизта субъектда эса жавоб кўрсатишнинг ўртача даражаси жорий қилинган.
Декабрь бошида Россия Мудофаа вазирлиги Украина реактивлар дронлар ёрдамида Рязань вилоятидаги Дягилево ва Саратов вилоятидаги Энгельс аэродромига зарба беришга уринганини маълум қилганди. Ҳаво ҳужумига қарши мудофаа воситалари дронларни тутиб қолган, бироқ бўлаклар иккита самолёт корпусига зарар етказган, уч ҳарбий эса ҳалок бўлган.
Ҳаво ҳужумига қарши мудофаа тизими ишга тушгани ҳақида Севастополь ҳукумати бир неча марта хабар берган. Украина Қрим ярим оролини ўз ҳудуди деб ҳисоблайди ва, Буданов таъкидлаганидек, у ерда «ҳар қандай қурол»дан фойдалана олади. Дронлар Бельбек аэропорти осмонида сўнгги марта 4 январь куни уриб туширилган.
Изоҳ (0)