Donetskning Makeyevka shahridagi Rossiya bazasiga 31-dekabr kuni uyushtirilgan zarba Rossiya rasmiylarining keskin tanqidiga sabab bo‘ldi. Bu esa prezident Vladimir Putinning obro‘siga putur yetkazishi mumkin. Amerika urushni o‘rganish instituti (ISW) 2-yanvar kungi hisobotida bu bo‘yicha ma’lumot berdi.
Ma’lum qilinishicha, Rossiya Mudofaa vazirligi voqea uchun aybni Donetsk xalq respublikasi rasmiylari va safarbar qilinganlar zimmasiga yuklashga harakat qilishi mumkin. DXR ma’lumotlariga ko‘ra, rossiyalik harbiy xizmatchilar operativ xavfsizlikni buzgan va shaxsiy mobil telefondan foydalangan, bu esa Ukrainaga bazaga aniq zarba berish imkonini bergan.
Biroq Rossiya Mudofaa vazirligining zarbani tan olishi Rossiya harbiy qo‘mondonligining tanqidiga sabab bo‘ldi.‘Vagner’ guruhiga aloqador harbiy blogerlarning aytishicha, Rossiya harbiy qo‘mondonligi yuzlab askarlarni bir joyda to‘plash orqali Ukraina kuchlariga zarba berishni osonlashtirgan.
Boshqa blogerlarning ta’kidlashicha, Rossiya qo‘mondonligi so‘nggi 11 oy ichida bunday hujumlarga guvoh bo‘lgan, ammo beparvolik qilgan.
ISW yuqorida keltirilgan muvaffaqiyatsizliklar Putinning harbiylarni tinchlantirishga qaratilgan sa’y-harakatlarini murakkablashtirishini ta’kidladi.
“Putinning tanqidlarga javob bera olmasligi va Rossiya harbiy kampaniyasidagi kamchiliklarni to‘g‘rilay olmasligi uning amaliy harbiy rahbar sifatidagi ishonchiga putur yetkazmoqda”, — deya xulosa qilgan ekspertlar.
Eslatib o‘tamiz, Yangi yil arafasida Rossiya armiyasining safarbar qilingan askarlari joylashgan Makeyevkaga raketa zarbalari berilgan. Ukraina tomoni hodisa oqibatida 400 ga yaqin harbiy halok bo‘lgani, 300 nafari yaralanganini xabar qilgan.
Rossiya Mudofaa vazirligi Makeyevkadagi harbiylar joylashtirilgan joyga HIMARS tizimi yordamida zarba berilganini aytib, hujumda 63 nafar askar o‘lganini ma’lum qilgan.
Izoh (0)