Buyuk Britaniya Mudofaa vazirligi Ukrainadagi urushning qanday kechayotgani bo‘yicha hisobot e’lon qildi. Vazirlikning Twitter sahifasida bu bo‘yicha ma’lumot berildi.
Hisobotda Ukrainaning Makeyevkaga bergan zarbalari oqibatida Rossiya armiyasidagi yo‘qotishlar soni va buning sababi keltiriladi.
“Makeyevkadagi bino butunlay vayron bo‘lgan va Rossiya Mudofaa vazirligi tasdiqlaganidek, 89 nafar rossiyalik harbiy halok bo‘lgan. Zarar ko‘lamini hisobga oladigan bo‘lsa, o‘q-dorilar turar joy binolari yaqinida saqlangan. Ular raketa zarbasi paytida portlab, ikkilamchi portlashlarga olib kelgan bo‘lishi mumkin.
Bino urushning eng shiddatli nuqtasidan biri bo‘lgan front chizig‘ining Avdeyevka sektoridan atigi 12,5 kilometr uzoqlikda joylashgan. Rossiya armiyasi Ukrainadagi urushgacha xavfli o‘q-dorilarni saqlash tajribasiga ega edi. Ammo noprofessionallik Rossiya armiyasida qurbonlar sonining oshishiga sabab bo‘lmoqda”, — deyiladi hisobotda.
Eslatib o‘tamiz, Yangi yil arafasida Rossiya armiyasining safarbar qilingan askarlari joylashgan Makeyevkaga raketa zarbalari berilgan. Ukraina tomoni hodisa oqibatida 400 ga yaqin harbiy halok bo‘lgani, 300 nafari yaralanganini xabar qilgan.
Rossiya Mudofaa vazirligi Makeyevkadagi harbiylar joylashtirilgan joyga HIMARS tizimi yordamida zarba berilganini aytib, hujumda 63 nafar askar o‘lganini xabar qilgan. Keyinchalik ularning soni 89 kishiga oshgan.
Mavzuga doir: Ukrainaning Makeyevkaga hujumi Putinning obro'siga putur yetkazadi — ISW
Izoh (0)