Saudiya Arabistoni so‘nggi yillarda mamlakatdagi ayollarga kengroq imkoniyatlar taqdim etish bo‘yicha katta yutuqlarga erishdi. Bu sa’y-harakatlar valiahd shahzoda Muhammad bin Salmonning qirollikdagi ayollarning mavqeini oshirish va teng imkoniyatlarni taqdim etishga qaratilgan Vision 2030 tashabbusi doirasida amalga oshmoqda.
Saudiya Arabistoni hozirgacha besh nafar saudiyalik ayolni Qirollikning dunyo mamlakatlaridagi elchi sifatida tanlab olgan. Quyida ular haqida ma’lumot beriladi.
1. Malika Rima bint Bandar Al Saud
Malika Rima bint Bandar 2019-yilda Saudiya Arabistonining birinchi ayol elchisi bo‘ldi, o‘shanda valiahd shahzoda Muhammad bin Salmon qirol o‘rinbosari sifatida qirollik farmoni bilan uni AQSHda elchi etib tayinladi.
Malika Rima avvalroq Saudiya Arabistoni Bosh sport boshqarmasida rejalashtirish va rivojlanish bo‘yicha muovini va hokimiyatning ayollar ishlari bo‘yicha vitse-prezidenti lavozimlarida ishlagan.
U, shuningdek, Ommaviy ishtirok federatsiyasi prezidenti bo‘lib, Saudiya Arabistonida multi sport federatsiyasini boshqargan birinchi ayol hisoblanadi. Malika Rima faoliyati davomida ayollarning imkoniyatlarini kengaytirish tarafdori bo‘lgan va Saudiya ayollari uchun Qirollikdagi imkoniyatlarni kengaytirishga harakat qilgan.
Uning otasi shahzoda Bandar bin Sulton ham 1983-yildan 2005-yilgacha mamlakatning AQSHdagi elchisi bo‘lib ishlagan.
2. Amal Yahyo al-Moallimi
2020-yilda Amal al-Moallimi Saudiya Arabistonining Norvegiyadagi elchisi etib tayinlandi va bu bilan Qirollikning ikkinchi ayol elchisiga aylandi.
Al-Moallimi malika Nora bint Abdul Rahmon universitetida ingliz tili bo‘yicha bakalavr va AQSHning Denver universitetida ommaviy kommunikatsiya va media yo‘nalishi bo‘yicha magistr darajasiga ega.
2019-yilda Saudiya Arabistoni Inson huquqlari bo‘yicha komissiyasida tashkilotlar va xalqaro hamkorlik bo‘yicha bosh direktor lavozimida ishlagan. Bundan avval u Saudiyadagi Qirol Abdulaziz nomidagi Milliy muloqot markazi bosh kotibining yordamchisi bo‘lgan.
3. Inas al-Shahvan
Inas al-Shahvan 2021-yil aprel oyida Saudiya Arabistonining Shvetsiya va Islandiyadagi elchisi sifatida faoliyat olib borgan. U qirollik vakili etib tayinlangan uchinchi saudiyalik ayoldir.
Al-Shahvan Avstraliya universitetida xalqaro munosabatlar bo‘yicha magistr darajasiga, shuningdek Garvard universitetining Rivojlanayotgan yetakchilik dasturi sertifikatiga ega.
2007-yilda al-Shahvan Tashqi ishlar vazirligida diplomatik korpusdan elchi bo‘lgan birinchi ayol bo‘ldi. Shuningdek, u TIVda bir qancha lavozimlarda ishlagan, jumladan, tashqi ishlar vaziri o‘rinbosarining siyosiy masalalar bo‘yicha maslahatchisi bo‘lgan. TIVning siyosiy va iqtisodiy masalalar bo‘yicha departamentida bo‘lim mudiri lavozimini egallagan birinchi ayol hisoblanadi.
4. Haifa al-Jadea
Haifa al-Jadea 2023-yil 3-yanvarda Qirollikning Yevropa Ittifoqi va Atom energiyasi bo‘yicha Yevropa hamjamiyatidagi elchisi va missiyasi rahbari etib tayinlandi.
Al-Jadea Kolumbiya universitetida konfliktni hal qilish va muzokaralar bo‘yicha magistr darajasini va Sirakuza universitetida xalqaro munosabatlar bo‘yicha magistr darajasini, shuningdek, Sirakuza universitetida jurnalistika bo‘yicha bakalavr darajasini olgan.
U Saudiya tadqiqot va media guruhi ijrochi guruhining sakkiz a’zosidan biri va “SRMG Think” kompaniyasining bosh direktori bo‘lgan. Elchi Saudiya Arabistonining 2030-yilga mo‘ljallangan Vision dasturi doirasidagi tashabbuslar ustida ishlash uchun Ar-Riyodga ko‘chib o‘tishdan oldin Birlashgan Millatlar Tashkilotining (BMT) Terrorga qarshi kurash markazida ishlagan.
U, shuningdek, BMT Xavfsizlik Kengashida Qirollik vakili bo‘lgan va Saudiya Arabistoni Turizm vazirligining Xalqaro aloqalar bosh boshqarmasiga mas’ul bo‘lgan.
5. Nisrin al-Shibel
Nisrin bint Hamad al-Shibel Saudiya Arabistonining Finlyandiyadagi elchisi etib 2023-yil 3-yanvar kuni al-Yamama saroyida tayinlandi. U qirol Salmon bin Abdulaziz huzurida qasamyod qilgan.
Qasamyod marosimidan so‘ng yangi tayinlangan elchi o‘zining rasmiy Twitter sahifasida qirolga minnatdorlik bildirgan.
“Qirol Salmon bin Abdulaziz Al Saud va valiahd shahzoda oliylariga yuksak ishonch uchun o‘z minnatdorligimni bildiraman. Ularning maqsadlarini ro‘yobga chiqarish va ishimni to‘liq bajarishim uchun Undan yordam so‘rayman. Shuningdek, tashqi ishlar vazirligiga qo‘llab-quvvatlagani uchun minnatdorlik bildiraman”, — deb yozgan u.
Izoh (0)