Belarus har qanday vaqtda Rossiyaga Ukrainaga shimoldan hujum qilish imkoniyatini berishga tayyor. Bu haqda Ukraina Davlat chegara xizmati rahbari Sergey Deyneko ma’lum qildi.
Uning so‘zlariga ko‘ra, hozirda chegarada Rossiya hujumkor tuzilmalari qayd etilmagan, buning o‘rnida ukrainalik chegarachilar Rossiya va Belarus ishtirokidagi “ittifoqdosh” armiya bo‘linmalari almashayotganini kuzatmoqda.
“Hozirda Belarus hududidagi (asosan Ukraina bilan chegaradan uzoqroqda joylashgan Vitebsk viloyatidagi poligonlarda) Rossiya qo‘shinlarining umumiy soni 10 200 dan 10 500 tani tashkil qiladi. Ularning bir qismi ikki hafta ichida Rossiya hududiga ko'chirilishi va keyinchalik Donbassdagi jangovar zonaga yuborilishi mumkin. Ularning o‘rnini esa Rossiyaning 6-motoo‘qchilar diviziyasi 3-armiya korpusi harbiy xizmatchilaridan bir guruhi egallaydi”, — dedi Deyneko.
Davlat chegara xizmati rahbari Belarusning harbiy infratuzilmasi rus qo‘shinlarini jangovar muvofiqlashtirish uchun ishlatilishini aytdi.
“Agar tahdid bormi deb so‘rasangiz? Albatta, bor. Lekin uning hozirgi holatini oshkor etolmayman. Hujum takrorlanishi mumkin, ammo bu muvaffaqiyatli bo‘lmasligiga ishonchim komil. Agar ular navbatdagi mag‘lubiyatga tayyor bo‘lsa, ertagayoq hujum boshlashi mumkin. Ammo ularda yetarli kuch yo‘q deb o‘ylayman, yanvar oyida ‘ittifoqdosh’ qo'shinlar Ukrainaga hujum qilishi dargumon”, — deya qo‘shimcha qildi u.
Avvalroq Belarus prezidenti Aleksandr Lukashenko Ukraina bilan chegarada harbiy manyovrlar o‘tkazilayotgani sababini aytgandi. U mamlakatga hujum qilish ehtimolini sababli himoya maqsadida manyovrlar amalga oshirilayotganini ta’kidladi.
“Tinchlik istasang, urushga tayyorlan. Bu bilan men jamiyatimizda, ayniqsa, internetda Belarus va Rossiya qurolli kuchlarining birgalikdagi harakati haqidagi mish-mishlarga javob bermoqchiman”, — dedi u.
Siyosatchi mamlakatda tashqi tahdidlarga javob berish uchun Rossiya va Belarus qo‘shinlarining qo‘shma guruhi tuzilganini eslatgan.
Izoh (0)