Serbiya prezidenti Aleksandr Vuchich 106 ta mamlakat Kosovoning mustaqilligini tan olmayotgani, 84 ta tan olgani, yana uchta davlat esa “oxirigacha e’tirof etmagani”ni ma’lum qildi. Yil yakunidagi an’anaviy matbuot anjumanida u qaysi to‘qqiz davlat Kosovoni tan olish haqidagi qaroridan voz kechganini oshkor qildi.
“Kosovo mustaqilligini tan olgan mamlakatlarning o‘ntasi o‘z qarorlarini o‘zgartirdi, bular: Somali, Burkina-Faso, Gabon, Asvatini, Liviya, Gvineya, Antigua va Barbuda, Sent-Lyusiya, Maldiv… O‘ninchisini ham kutyapmiz”, — dedi Vuchich.
Avvalroq Serbiya tashqi ishlar vaziri Ivitsa Dachich o‘ninchi mamlakat Kosovo mustaqilligini tan olish haqidagi qarorini o‘zgartirganini aytgan, ammo aynan qaysi davlatlar ekaniga aniqlik kiritmagan edi. Serbiya hukumati ilgarilari Kosovoni tan olish fikridan qaytgan mamlakatlar ro‘yxatini oshkor qilmasdi.
Dekabrda 350 ga yaqin kosovolik politsiyachilar respublikaning serblar yashaydigan shimoliy qismiga bostirib kirganidan keyin, Kosovoda vaziyat keskinlashdi. Shundan so‘ng, u yerda norozilik aksiyalari boshlandi. Serbiya qurolli kuchlarni jangovar shaylik rejimiga o‘tkazdi, biroq 29-dekabr kuni bu rejim bekor qilindi.
Izoh (0)