Rossiya prezidenti Vladimir Putin Rojdestvo bayrami munosabati bilan Ukrainadagi to‘qnashuv chizig‘i bo‘ylab o‘t ochishni to‘xtatishga ko‘rsatma berdi. Bu haqda “Kremlin.ru” xabar berdi.
Xabarga ko‘ra, o‘t ochishni to‘xtatish 6-yanvar soat 12:00dan 7-yanvar soat 24:00gacha amal qiladi. Putin tegishli topshiriq bilan mamlakat mudofaa vaziri Sergey Shoyguga murojaat qildi. Moskva Kiyevni ham o‘t ochishni to‘xtatishni e’lon qilishga va fuqarolarning Rojdestvo marosimlarida qatnashishiga ruxsat berishga chaqirmoqda.
“Pravoslavlikni tan olgan ko‘p sonli fuqarolar urush hududlarida istiqomat qilayotganidan kelib chiqib, Ukraina tomonini o‘t ochishni to‘xtatish rejimini e’lon qilishga va ularga Rojdestvo arafasida marosimlarda qatnashishga ruxsat berishga chaqiramiz”, — deyiladi bayonotda.
Patriarx Kirillning murojaatini inobatga olib, o‘t ochish rejimi e’lon qilinayotgani qo‘shimcha qilingan.
Izoh (0)