Rossiya Ukrainada urush boshlaganidan beri 83,5 mlrd dollardan ko‘proq mablag‘ yo‘qotdi

Rossiya 2022-yilning 24-fevral kuni Ukrainaga nisbatan urush boshlaganidan beri jami 6 trln rubldan ortiq — 83,5 mlrd dollardan ko‘proq mablag‘ yo‘qotdi. Bu haqda rossiyalik jurnalist Ilya Varlamov navbatdagi videoreportajida ma’lum qilgan.

Unga ko‘ra, urush natijasida Rossiyaning YIM 4,5 foizga pasaygan, inflyatsiya esa 12,5 foizga yetgan. Reportajda ta’kidlanishicha, bitta jangovar raketa Rossiya uchun 186 mln rublga (2,5 mln dollardan ortiq) tushadi. Shu paytga qadar rus harbiylari tomonidan Ukrainaga jami 4000 ta raketa uchirilgan. Faqatgina raketalarning o‘zi uchun Rossiya shu kungacha 750 mlrd rubl (10,4 mlrd dollar) sarflagan.

Rasmiy ma’lumotlarga ko‘ra, o‘tgan yilning kuzida 318 ming nafar zaxiradagilar Rossiya Qurolli kuchlariga safarbar qilingan. Safdor askar uchun oylik to‘lanadigan minimal mablag‘ 195 ming rublni (2700 dollar), kichik ofitserlar uchun esa 250 ming rublni (3500 dollar) tashkil qiladi.

Hisob-kitoblarga ko‘ra, hozirda safarbar qilinganlar uchun Rossiya oyiga 167 mlrd rubl (2,3 mlrd dollar) sarflamoqda.

Urushning dastlabki 6 oyida halok bo‘lgan va yaralanganlar uchun to‘langan kompensatsiya miqdori 113 mlrd rublni (1,6 mlrd dollar) tashkil qilgan.

Bundan tashqari, 2022-yilning yanvar—sentabr oylarida Rossiyadagi jismoniy shaxslar hisob raqamlaridan jami 36 mlrd dollar miqdoridagi mablag‘ mamlakatdan tashqariga olib chiqib ketilgan.

Umumiy hisoblaganda, Rossiya urush tufayli 6 trln rubldan (83,5 mlrd dollar) ko‘proq mablag‘ yo‘qotdi. Shuni ham inobatga olish kerakki, bu raqamlar ichiga sanksiyalar tufayli yuzaga kelgan yo‘qotishlar kiritilmagan.