Afg‘onistonda kasalxonalar pnevmoniyaga chalingan bolalar bilan to‘lmoqda. Aholining yetarli issiqlik ta’minotiga ega emasligi kasallik ortishi sabablaridan biri bo‘lmoqda. Bu haqda Reuters xabar berdi.
Noyabrda 6 700 dan ortiq bola pnevmoniya, yo‘tal, astma va boshqa nafas yo‘li kasalliklariga chalingan. Mamlakatda 2022-yilda pnevmoniyaga chalingan besh yoshgacha bo‘lgan bolalar soni 2021-yilga nisbatan 50 foizga oshgan.
“Kasalxona davolanish uchun yaxshi, bu yerda tinch bo‘laman. Bir oy oldin bolam kasal edi, uni bu yerga olib keldim, sog‘aydi. Biroq yana kasallandi”, — deydi kobullik 22 yoshli ayol.
Shifokorlar minglab bolalar sovuq va to‘yib ovqatlanmaslik oqibatida pnevmoniyaga chalinayotganini aytmoqda.
“Xonam juda sovuq bo‘lgani uchun bolam ko‘p kasal bo‘ldi. Bu qish mavsumini qanday o‘tkazaman, deb o‘ylayapman. Hatto shifokorlar ham bolamni uyda issiq saqlashni so‘radi. Farzandim ikkinchi marta pnevmoniyaga uchradi. Shifokorlar unga yo‘talga qarshi sirop berdi, lekin bolam tuzalmadi. Davolanish narxi 17 dollarga bormoqda. Dorilarning hammasini sotib olishga qurbim yetmadi.
O‘tgan qishda erimning ishi bor edi, iqtisodiy ahvolimiz hozirgidan yaxshi edi. U ‘Tolibon’ hokimiyat tepasiga kelganidan beri ishsiz, hozir esa kuniga 1-3 dollar topadi, iqtisodiy ahvolimiz yomon”, — deydi ayol.
“Yil davomida pnevmoniyaning oshishiga sabab bor. Afsuski, sovuq havo kasallikka chalinish ehtimolini oshiradi. Havoning ifloslanishi ham bunga ta’sir qiladi. Iqtisodiy ahvoli og‘ir bo‘lganlarning bolalari kasallikdan aziyat chekadi”, — deydi Indira Gandi bolalar kasalxonasi mudiri Orif Hassanzay.
Afg‘onistonlik shifokor Hussayn Afzaliy ayrim xayriya jamoat tashkilotlari dori-darmonlar bersa-da, hali ham xodimlar yetishmayotganini aytmoqda.
“Shifokorlar, mutaxassislar, hamshiralar yetishmayapti. Bemorlarning doimiy oqimi biz uchun katta qiyinchilik tug‘dirmoqda”, — degan u.
Afg‘oniston og‘ir iqtisodiy inqirozga yuz tutmoqda, oilalar yetarli issiqlik ta’minoti yo‘qligidan qiynalmoqda. Bu bolalar orasida pnevmoniya ko‘payishiga olib keldi.
Izoh (0)