Afg‘onistonning Badaxshon viloyatida Abu Umar taxallusli “Tolibon”ning tojikistonlik a’zosi o‘ldirib ketildi. Bu haqda Hasht-e Subh Daily xabar berdi.
Ma’lum qilinishicha, Abu Umar tajribali minachi va “Tolibon”ning chet ellik yosh jangchilariga murabbiylik qilgan. U o‘limidan uch kun oldin Badaxshon viloyatining Bahorak tumanida g‘oyib bo‘lgan. Abu Umarning jasadi 4-yanvar kuni tunda tumandagi qishloqlardan birida topilgan. Abu Umar qanday va kim tomonidan o‘ldirilgani hozircha noma’lum.
Marhum Afg‘onistonning shimoliy hududlari uchun olib borilgan janglarda “Badaxshondagi hukumat qo‘shinlarining ishchi kuchi va harbiy texnikasini yo‘q qilishda muhim rol o‘ynagani” ta'kidlanadi. Abu Umarning o‘limi haqidagi xabarga Tojikiston rasmiylari tomonidan hech qanday munosabat bildirilmagan. Uning Xatlon viloyatining Vaxsh tumanida tug‘ilgani ma’lum, marhum haqida yetarli ma’lumotlar yo‘q.
Ayni paytda o‘nlab “tojik toliblari” Tojikiston bilan chegaradosh Badaxshon, Bahorak, Shug‘non va Nusay tumanlarida joylashgan. Ulardan biri, Nurobod viloyatida tug‘ilgan, terrorchilikda ayblanib, 9 yildan beri qidiruvda bo‘lgan “Mehdi Arsalan” taxallusli Muhammad Sharifov Afg‘oniston shimolidagi “Tolibon” chegara otryadiga qo‘mondonlik qiladi.
Izoh (0)