Shimoliy Koreya rahbari Kim Chen In 28-dekabr, chorshanba kuni hukmron Koreya Mehnat partiyasi konferensiyasida 2023-yil uchun mamlakat harbiy qudratini mustahkamlash bo‘yicha maqsadlarni belgilab berdi.
Shimoliy Koreyaning Markaziy telegraf davlat axborot agentligi rasmiy bayonotida bu vazifalarning mohiyati oshkor qilinmagan, biroq Kim Chen In Koreya yarim orolidagi “yangi murakkab vaziyat” hamda kengroq geosiyosiy holatlar haqida umumiy ma’lumot bergani ta’kidlangan.
“Kim Chen In tashqi siyosat tamoyillari va dushmanga qarshi kurash yo‘nalishini ko‘rsatib berdi. Partiyamiz va hukumatimiz suveren huquqlarni hamda milliy manfaatlarni himoya qilish uchun ularga qat’iy amal qilishi kerak”, — deyiladi xabarda.
Agentlik, shuningdek, “o‘z-o‘zini mudofaa qilish qobiliyatini kuchaytirish bo‘yicha maqsadlar siyosiy vaziyatning turli tomonga tebranishiga tayyorgarlik doirasida” taqdim etilganini ta’kidladi.
Kim Chen Inning uchrashuvi ertasi kuni ham davom etishi qo‘shimcha qilindi.
Shimoliy Koreya raketa va dronlar uchirmoqda
26-dekabr kuni Janubiy Koreya KXDR dronlari ikki davlat o‘rtasidagi chegara chizig‘ini kesib o‘tganini da’vo qilib, qiruvchi samolyotlar va jangovar vertolyotlarini havoga ko‘tardi. Shuningdek, bu Seul aeroportlarida fuqarolik reyslarining vaqtinchalik to‘xtatilishiga olib keldi. Dronlarga qurol ortilgani aniqlanmagan.
Bungacha Shimoliy Koreya dronlari 2014 va 2017-yillarda Janubiy Koreya bilan chegaraning janubida qayd etilgandi. Ularning parvozlari Janubiy Koreya rahbariyatini tashvishga solmoqda, chunki dronlar ham razvedka operatsiyalari, ham zarbalar uchun ishlatilishi mumkin.
18-dekabr kuni Janubiy Koreya harbiylari Koreya yarim orolining sharqiy qirg‘og‘idan KXDR hududidan Yapon dengizi tomon ikkita ballistik raketa uchirilgani haqida xabar berdi. Ushbu turdagi raketalar yadroviy kallaklarni olib yurishi va Yaponiyadagi nishonlarga tegishi mumkin.
Reuters ma’lumotlariga ko‘ra, Shimoliy Koreya 2022-yilda har qachongidan ham ko‘proq raketa uchirgan, Pxenyan joriy yil boshidan beri 50 dan ortiq raketa sinovlarini o‘tkazgan.
Izoh (0)