Janubiy Koreya harbiy vertolyotlari ikki mamlakat o‘rtasidagi harbiy demarkatsiya chizig‘ini kesib o‘tgan Shimoliy Koreya uchuvchisiz uchar qurilmalarini urib tushirish uchun qariyb yuz marta o‘t ochdi. Bu haqda Janubiy Koreyaning Yonhap agentligi Koreya Respublikasi Shtab boshliqlari birlashgan qo‘mitasiga tayanib xabar bermoqda.
Eni 2 metrdan ortiq bo‘lmagan dronlarni bunday o‘qlar bilan urib tushira olishmagan. Beshta drondan bittasi Seul osmonidan uchib o‘tgan, qolganlari Janubiy Koreya g‘arbidagi Kanxvado oroli yaqiniga borgan. U demarkatsiya chizig‘i yaqinida, Seul esa undan taxminan 50 km narida joylashgan. Keyinroq uchar qurilmalar Janubiy Koreya harbiylari monitoring zonasidan g‘oyib bo‘lgan.
Dronlar 26-dekabr kuni Toshkent vaqti bilan tonggi 6:35 da aniqlangan, shundan keyin Janubiy Koreya ogohlantiruvchi xabarlar tarqatgan, qiruvchilar, vertolyotlar va havo hujumiga qarshi mudofaa vositalari trevoga bo‘yicha havoga ko‘tarilgan. Respublika o‘z uchuvchisiz uchar qurilmalarini chegara yaqinidagi tumanlarga yo‘naltirdi.
Agentlik qayd etishicha, ushbu “hujum” besh yil ichidagi birinchi shunday voqea bo‘lgan.
Eslatib o‘tamiz, Janubiy Koreyaning trevoga bo‘yicha havoga ko‘tarilgan KA-1 yengil hujumchi samolyotlaridan biri halokatga uchradi.
Transport vazirligi Kimpxo va Inchxon xalqaro aeroportlariga parvozlarni taxminan bir soatga to‘xtatib qo‘ydi. Bu qaror sabablarini idora ma’lum qilmadi.
“Sinxua” agentligi ma’lumotlariga ko‘ra, Janubiy Koreya Harbiy-havo kuchlari samolyoti Kanvondo provinsiyasining Xenson okrugiga qulab tushgan. Bortda bo‘lgan ikki uchuvchi katapulta qilib, o‘zlarini qutqarishga muvaffaq bo‘lgan. So‘ng ular kasalxonaga yetkazilgan. Jangovar samolyot dala hududiga qulagan, tinch aholi orasidagi qurbonlar haqida ma’lumot berilgani yo‘q.
Izoh (0)