Janubiy Koreya harbiylari ikki mamlakat o‘rtasidagi harbiy chegara chizig‘ini kesib o‘tgan Shimoliy Koreya dronlarini yo‘q qilish bo‘yicha operatsiya muvaffaqiyatsiz o‘tgani uchun omma oldida uzr so‘radi. Bu haqda Birlashgan qo‘mitaning operatsion direktori Kan Sin Chxyolning bayonotiga asoslanib, Yonhap agentligi xabar berdi.
“Garchi harbiylarimiz dronlarni topib, kuzatib borgan bo‘lsa-da, ularni urib tushira olmaganimizdan afsusdamiz”, — dedi u va harbiylarning Shimoliy Koreya dronlari tahdidiga yetarlicha tayyorgarlik ko‘rmaganini tan oldi.
“Armiya dronlarga qarshi kurash uchun zarba beruvchi vositalarni safarbar qiladi, harbiylar KXDRning muhim harbiy obyektlar ortidan razvedka ishlarini olib boradigan dronlar bo‘linmasini tezroq yaratish tashabbusi bilan chiqadi”, — deb va’da berdi Kan Sin Chxyol.
26-dekabr kuni Kengido provinsiyasining chegara hududida KXDRning beshta droni aniqlangan, shundan keyin Janubiy Koreya ogohlantiruvchi xabarlar tarqatgan, qiruvchilar, vertolyotlar va havo hujumiga qarshi mudofaa vositalari trevoga bo‘yicha havoga ko‘tarildi. Respublika o‘z uchuvchisiz uchar qurilmalarini chegara yaqinidagi tumanlarga yo‘naltirdi.
Janubiy Koreya harbiylari KXDR dronlarini urib tushirish uchun qariyb yuz marta o‘t ochdi. Eni 2 metrdan ortiq bo‘lmagan dronlarni bunday o‘qlar bilan urib tushira olishmagan. Beshta drondan bittasi Seul osmonidan uchib o‘tgan, qolganlari Janubiy Koreya g‘arbidagi Kanxvado oroli yaqiniga borgan. U demarkatsiya chizig‘i yaqinida, Seul esa undan taxminan 50 km narida joylashgan. Keyinroq uchar qurilmalar Janubiy Koreya harbiylari monitoring zonasidan g‘oyib bo‘lgan.
Yonhap qayd etishicha, ushbu “hujum” besh yil ichidagi birinchi shunday voqea bo‘lgan.
Izoh (0)