АҚШ президенти Жо Байден 2023-молия йили учун 847,3 миллиард долларлик мудофаа бюджетини имзолади. Бу ҳақда Оқ уй сайтида эълон қилинган хабарда айтилади.
Ушбу сумманинг 800 миллион доллари Украинага ёрдам учун ажратилган. 6 миллиард долларни АҚШ Россияни Европада тийиб туриш учун ишлатади. 10 миллиардни эса Вашингтон Тайванга ҳарбий кўмак учун йўналтиради.
Ҳужжат Россиянинг халқаро ташкилотлардан, шу жумладан, G20 дан четлатилишини, Россия билан олтинга алоқадор операциялар учун санкцияларни, ҳарбий соҳада Россия билан ҳамкорликка тақиқни беш йилга узайтиришни кўзда тутади. Москва билан ракетага қарши мудофаа тизимлари ҳақида ахборот алмашишга нисбатан доимий тақиқ кучга киради.
АҚШ Конгресси мудофаа бюджети лойиҳасини 7 декабрь куни маъқуллаган эди. Украина президенти Владимир Зеленский Америка мудофаа бюджети Украина авиацияси имкониятларини кенгайтиришни ўз ичига олишини айтганди.
Маълумот учун, 2022 йилда АҚШ мудофаа бюджети 770 миллиард долларни, 2021 йилда 740,5 миллиард долларни, 2020 йилда 740 миллиард долларни, 2019 йилда 738 миллиард долларни ташкил этган.
Изоҳ (0)