AQSH Kongressi senati mamlakatning 2023-yil uchun mudofaa budjetini kelishib oldi, deb yozadi “Kommersant”. Avvalroq u Vakillar palatasi tomonidan tasdiqlangan edi.
Budjet 847,3 milliard dollarni tashkil qiladi, shuning 800 million dollari Ukrainaga harbiy yordam uchun yo‘naltiriladi. Mudofaa budjetining ushbu loyihasi AQSH tarixidagi eng yirigiga aylanishi mumkin.
“Ukraina va NATOga ko‘mak oshiriladi. Loyiha Ukrainaga xavfsizlik sohasida yordam tashabbusini kengaytiradi va modifikatsiya qiladi hamda 2023-moliya yilida qo‘shimcha 800 million dollar yordam ajratilishini tasdiqlaydi”, — deyiladi budjet loyihasida.
Bundan tashqari, budjet loyihasi Rossiya bilan harbiy hamkorlikka qo‘yilgan taqiqni besh yilga uzaytiradi. Kelishib olinganidan keyin hujjat imzolash uchun prezident Jo Baydenga yo‘naltiriladi.
Ukraina prezidenti Vladimir Zelenskiy AQSH mudofaa budjeti Kiyevga aviatsiya sohasida harbiy ko‘makni ko‘zda tutishini aytgandi.
AQSHning 2022-moliya yili uchun mudofaa budjeti 778 milliard dollarlik sarf-xarajatlarni ko‘zda tutgan edi. 4 milliard dollar Rossiyani Yevropada tiyib turish va Ukrainaga yordamni oshirishga qaratilgan tashabbuslarga ajratilgan edi.
Izoh (0)