Odamlar yaqin 10 yil ichida Oyda yashaydigan bo‘ladi — NASA

2030-yilga kelib, astronavtlar Oyda yashaydigan va ishlaydigan bo‘ladi. Bu haqda AQSH Aeronavtika va fazoni tadqiq qilish milliy boshqarmasi (NASA) vakili BBC telekanaliga bergan intervyusida aytib o‘tdi.

Amerika agentligining Orion Oy fazo kemalari dasturi rahbari Govard Xu qayd etishicha, “Artemida” missiyasi doirasida Orion kemasi ortilgan Space Launch System raketasining uchirilishi insonning koinotga parvozlari uchun tarixiy kunga aylangan. Missiya muvaffaqiyatli kechmoqda, barcha tizimlar ishlamoqda, jamoa esa Orion dvigatellarining 21-noyabr kungi keyingi parvoziga tayyorlanmoqda, unda fazo kemasi Oyning uzoq orbitasiga chiqariladi.

“Albatta, mana shu o‘n yillikda Oy yuzasida yashaydigan odamlar bo‘ladi. Ularning o‘z yashash joylari, oykezarlari bo‘ladi, ular ilm-fan bilan mashg‘ul bo‘ladi”, — dedi NASA vakili.

Ayni paytda Orion Oydan taxminan 134 ming kilometr uzoqlikda bo‘lib, kema bortida esa maxsus maneken bor, u parvozning odam organizmiga ta’sirini qayd etib boradi.

“Bu biz olis koinot bo‘yicha uzoq muddatga mo‘ljallangan tadqiqotlar yo‘lida qo‘ygan birinchi qadamimizdir. Bu nafaqat AQSH, balki butun dunyo uchun qilinyapti”, — dedi NASA vakili.

Shuningdek, Xuning aytishicha, NASA Orion kemasi yordamida odamlarni Oyga tushirish imkonini beruvchi uzoq muddatli dastur ishlab chiqmoqda. Uning so‘zlariga ko‘ra, agar “Artemida”ning joriy parvozi muvaffaqiyatli kechsa, unda keyingi parvoz ekipaj ishtirokida bo‘ladi. Undan keyin esa uchinchi parvoz uyushtirilib, uning doirasida astronavtlar bundan 50 yil avval — 1972-yil dekabrida “Apollon-17” kemasi parvozidan keyin birinchi marta yana Oyga qo‘nadi.

2022-yil 16-noyabr kuni Space Launch System eltuvchi raketasining uzoq kutilgan parvozi amalga oshirildi, bundan avval u bir necha marta kechiktirilgan edi. NASA uchinchi urinishdagina koinotga bugungi kundagi eng baquvvat raketani yuborishga muvaffaq bo‘ldi, uning asosiy vazifasi “Artemida” missiyasi doirasida Orion kosmik kemasini orbitaga chiqarishdan iborat edi. Parvoz muvaffaqiyatli amalga oshirildi, kema esa allaqachon Oyga qarab yo‘l oldi.

Mavzuga doir: NASA Oy missiyasi doirasida o‘ta og‘ir raketani uchirdi. Parvoz avval 3 marta kechiktirilgan