Икки нафар америкалик астронавт 22 декабрь куни Халқаро коинот станцияси (ХКС) бортидан очиқ коинотга чиқиб, унинг юзасига янги қуёш панелини ўрнатди ва уни энергия таъминоти тизимига улади, деб хабар бермоқда NASA.
Астронавтлар Фрэнк Рубио ва Жош Кассада ИРОСА қуёш панелларини ўрнатган, улар аллақачон электр энергияси етказиб беришни бошлаган. Иккита янги панел ХКСга 27 ноябрь куни Американинг SpaceX компаниясининг Cargo Dragon юк кемаси орқали етказилган эди. Улардан биринчиси 3 декабрь куни ўрнатилган.
ИРОСА панелларининг дастлабки бир жуфти ўтган йил июнида астронавтларнинг фазовий вакуумга уч марта чиқиб келиши натижасида ўрнатилганди. ХКС энергетика тизимини модернизация қилиш доирасида станцияга жами уч жуфт янги панеллар қўшилиши керак.
Ушбу панеллар станция фаолиятини таъминлаш учун электр энергиясини 30 фоизга кўпроқ ишлаб чиқариш имконини беради. Улар саккизта эски панеллар ёнига ўрнатилади, натижада станция энергия тизими туввати 160 дан 215 киловаттгача ошади.
NASA қайд этишича, ХКСдаги аввалги саккизта қуёш панели ҳозирча нормал тарзда ишламоқда, аммо улар аста-секинлик билан ишдан чиқиб боради, чунки уларнинг хизмат муддати 15 йилга мўлжалланган. Панелларнинг энг биринчилари станцияга ўрнатилганига 20 йилдан ошган.
Айни пайтда ХКС экипажи таркибига россиялик космонавтлар Сергей Прокопев, Дмитрий Петелин, Анна Кикина, америкалик астронавтлар Фрэнк Рубио, Жош Кассада, Никол Ман ҳамда Япония аэрокосмик тадқиқотлар агентлиги астронавти Коити Ваката киради.
Изоҳ (0)