F-15 қирувчиси ва разведкачи самолёт ҳамроҳлигида: Зеленский Вашингтонга қандай етиб олгани маълум бўлди

Украина президенти Владимир Зеленский Вашингтонга қай тарзда етиб олгани маълум бўлди, деб ёзади BBC.

Зеленскийни Украинадан АҚШ пойтахтига олиб келиш учун фавқулодда хавфсизлик чоралари кўрилган. Бу иккала мамлакат ўзаро муносабатларини қанчалик қадрлашидан гувоҳлик беради, дейилади хабарда.

20 декабрь, сешанба куни Зеленский Бахмутдаги фронт чизиғига борган, кейин эса тунги поездда Польшага йўл олган. Шу тариқа унинг Вашингтонга узоқ сафари бошланган. Польшада уни дарҳол АҚШ Ҳарбий-ҳаво кучлари самолёти олиб кетган, унга, хабарларга кўра, НАТОнинг разведкачи самолёти ва F-15 қирувчиси ҳамроҳлик қилган.

Россия ракеталари таҳдиди туфайли, Украина осмонида парвоз қилиш ўта хавфлидир, шу сабабли, Зеленский махфий равишда Украинадан Польшага поездда етиб олган. 21 декабрь, чоршанба куни тонгда уни чегарадаги Пшемисл шаҳрида темир йўл станциясида кўришган.

Зеленский Украинага қайтишда ҳам, катта эҳтимол билан, шу йўналишда ҳаракатланиб, яна Польша орқали ўтган. Чунки у АҚШдан қайтишдан польшалик ҳамкасби Анжей Дуда билан учрашгани хабар берилди.

Президентлар Польшанинг Жешув шаҳрида кўришди, у ерда Дуда рафиқаси Агата билан бирга Рождество арафасида аскарлар ва офицерлар билан мулоқот қилган эди. Зеленский ва Дуда 2022 йил якунларини ва Россия ҳарбий операциясини муҳокама қилди. Украина мудофаа қобилиятини кучайтириш ва гуманитар масалаларга урғу берилди.

Эслатиб ўтамиз, 21 декабрь куни Зеленский АҚШга келиб, Америка президент Жо Байден билан учрашди. Қўшма матбуот анжуманида Зеленский Киев ва Вашингтон алоқаларида ҳақиқий иттифоқчилик босқичи бошланганини айтди ва Patriot тизимларини ўз ичига олувчи янги ёрдам пакетини «ажойиб янгилик» деб атади. Украина президенти АҚШ Конгресси 45 миллиард долларлик ёрдам пакетини маъқуллашига умид билдирди.

Аввалроқ АҚШ ҳукумати Украина президенти Владимир Зеленскийнинг Вашингтоннинг ташрифи чоғида унинг ҳаётига суиқасд уюштирилиши эҳтимолидан ташвишланиб, хавфсизлик чораларини кучайтиргани хабар берилган эди. Манбага кўра, бундай хавф Россия томонидан келмоқда, ва шу муносабат билан, юқори мансабли ҳукумат амалдорлари, шунингдек, АҚШдаги элчихона ходимлари Зеленскийнинг бўлажак ташрифи ҳақида олдиндан хабардор қилинмаган.

Зеленскийнинг Вашингтонга ташрифи ҳақида биринчи бўлиб CNN телеканали манбаларига таяниб хабар қилганди, у ҳақда олдиндан эълон қилмаганди. Кейинроқ Оқ уй ва Украина етакчисининг ўзи ҳам ташрифни тасдиқлади.