Ukraina prezidenti Vladimir Zelenskiy AQSHdan qaytishdan polshalik hamkasbi Anjey Duda bilan uchrashdi. Bu haqda Ukraina yetakchisi saytida xabar berildi.
Prezidentlar Polshaning Jeshuv shahrida ko‘rishdi, u yerda Duda rafiqasi Agata bilan birga Rojdestvo arafasida askarlar va ofitserlar bilan muloqot qilgan edi. Zelenskiy va Duda 2022-yil yakunlarini va Rossiya harbiy operatsiyasini muhokama qildi. Ukraina mudofaa qobiliyatini kuchaytirish va gumanitar masalalarga urg‘u berildi.
Zelenskiy Dudaga “Polsha va uning fuqarolari tomonidan ukrainaliklarga berilayotgan katta ko‘mak” uchun minnatdorlik bildirdi. Yetakchilar kelajak uchun strategik rejalar va ikki tomonlama aloqalar haqida gaplashib oldi.
Eslatib o‘tamiz, 21-dekabr kuni Zelenskiy AQSHga kelib, Amerika prezident Jo Bayden bilan uchrashdi. Qo‘shma matbuot anjumanida Zelenskiy Kiyev va Vashington aloqalarida haqiqiy ittifoqchilik bosqichi boshlanganini aytdi va Patriot tizimlarini o‘z ichiga oluvchi yangi yordam paketini “ajoyib yangilik” deb atadi. Ukraina prezidenti AQSH Kongressi 45 milliard dollarlik yordam paketini ma’qullashiga umid bildirdi.
Izoh (0)