Oq uyda AQSH va Ukraina prezidentlari Jo Bayden va Vladimir Zelenskiy o‘rtasida muzokaralar bo‘lib o‘tdi, deb yozadi CNN.
Uchrashuvning ochiq qismida Bayden Ukrainadagi urush 300 kundan ortiq davom etayotganini ta’kidladi. U Vashington va Kiyevning Rossiya tajovuziga qarshi birgalikdagi kurashini sharaf deb hisoblaydi.
“Putin olib borayotgan bu shafqatsiz urushga qarshi bizning birgalikdagi kurashimizda siz bilan yonma-yon turish men uchun katta sharaf”, — dedi AQSH prezidenti.
Bayden Rossiya tomonidan Ukraina muhim infratuzilmasining o‘qqa tutilishini qoraladi va Putin “qishdan qurol sifatida foydalanishga urinayotgani”ni aytdi. Shuningdek, u amerikaliklar yevropalik ittifoqdoshlari bilan birgalikdaKiyevni qo‘llab-quvvatlashiga ishontirdi.
O‘z navbatida, Zelenskiy Ukrainaga berilayotgan yordam uchun AQSH xalqi va hukumatiga minnatdorlik bildirdi. Uning qo‘shimcha qilishicha, Oq uyda bo‘lish — u uchun “katta sharaf”.
“Taklifingiz uchun rahmat. Men haqiqatan ham avvalroq kelmoqchi edim, prezident Bayden buni biladi, lekin imkonim bo‘lmadi, chunki vaziyat murakkab edi. Endi kelibman, demak, biz vaziyatni nazorat qilyapmiz, bu esa birinchi navbatda — sizning ko‘magingiz sharofati bilan”, — dedi Ukraina yetakchisi.
Uchrashuv chog‘ida Zelenskiy sovg‘a sifatida Baydenga Baxmut ostonalarida jang olib borayotgan HIMARS batareyasi komandirining Jangovar xizmatlar ordenini topshirdi. Uning so‘zlariga ko‘ra, Pavlo ismli harbiy xizmatchi mukofotni AQSH prezidentiga berishni so‘ragan. “Bunga loyiq emasman, lekin juda qadrlayman”, — dedi bunga javoban Bayden.
Vladimir Zelenskiy 21-dekabr kuni e’lon qilinmagan tashrif bilan Vashingtonga keldi. Tashrif doirasida Amerika yetakchisi bilan muzokaralar o‘tkazdi, shuningdek, AQSH Kongressida nutq so‘zladi.
Izoh (0)