Germaniya hukumati mustamlakachilik davrida olib chiqib ketilgan Benin bronzalarini Nigeriyaga qaytardi.
Tarixiy yodgorliklarni vatanga qaytarish marosimi Nigeriya poytaxtida o‘tkazildi. Uning doirasida Germaniya tashqi ishlar vaziri Annalena Berbok va boshqa rasmiylar 20 ta Benin bronzalarini Nigeriyaga topshirdi.
“Bugun biz Benin bronzalarini o‘z joyiga — Nigeriya xalqiga qaytarish uchun keldik. Xatoni tuzatish uchun keldik”, — dedi Germaniya tashqi ishlar vaziri Annalena Burbok Abujadagi rasmiy marosimda.
1897-yilda ingliz mustamlakachilari tomonidan o‘g‘irlangan va butun dunyo muzeylariga sotilgan 20 ta qimmatbaho bronzalarning vatanga qaytarilishi Germaniya madaniyat vaziri Klaudiya Rot tomonidan ham “tarixiy kun” sifatida baholandi.
“Biz hech qachon bizga tegishli bo‘lmagan narsani qaytarmoqdamiz”, — dedi u.
Qayd etilishicha, bu xazinalar Afrikadan o‘g‘irlab ketilgan va Germaniya bo‘ylab bir qancha muzeylarda saqlanayotgan 1 130 ta ashyoning kichik bir qismi, xolos. Bronza, fil suyagi va boshqa qimmatbaho materiallardan yasalgan ushbu buyumlar Afrika qit’asida yaratilgan eng muhim san’at asarlaridan hisoblanadi.
“Yigirma yil oldin bu bronzalar Nigeriyaga qaytishini hech kim xayoliga ham keltirmasdi, chunki bu yo‘ldagi to‘siqlar yengib bo‘lmasdek tuyulardi. Ammo bugun do‘st mamlakat Germaniyaning sa’y-harakatlari tufayli tarix o‘zgardi. Bronzaning qaytishi — bizdan o‘g‘irlangan madaniy o‘ziga xoslikni ham qaytarib olishga urinish”, — dedi Nigeriya axborot va madaniyat vaziri Alhaji Lay Mohammed.
Nigeriya birinchi eksponatlarning qaytarilishini 2023-yil boshida artefaktlarni namoyish qiluvchi yirik ko‘rgazma bilan nishonlamoqchi. Nigeriya muzeylari va yodgorliklari milliy komissiyasi bosh direktori Abba Isa Tijanining aytishicha, ko‘rgazma nigeriyaliklarga qaytarilgan buyumlarni ko‘rish imkonini beradi. Nigeriya faqat Benin bronzalarini namoyish etadigan va saqlaydigan zamonaviy muzey qurishni rejalashtirmoqda.
Izoh (0)