Kreml Ukraina prezidenti Vladimir Zelenskiyning Vashingtonga tashrifidan keyin ijobiy o‘zgarishlar bo‘lishini kutmayapti. Bu haqda Rossiya prezidenti matbuot kotibi Dmitriy Peskovga tayanib, “Vedemosti” xabar berdi.
“Qurol yetkazib berish davom etmoqda, yetkazib beriladigan qurol-yarog‘ ko‘lami kengaymoqda. Bularning barchasi, albatta, mojaroning kuchayishiga olib keladi va aslida Ukraina uchun yaxshilik olib kelmaydi”, — dedi u.
Ukraina prezidenti devoni Vladimir Zelenskiyning AQSHga rasmiy tashrifini tasdiqlagan. Bayden bilan uchrashuv chog‘ida davlat rahbarlari frontdagi keyingi harakatlar, ukrainalik askarlarni tayyorlash imkoniyati, Rossiyaga qarshi sanksiyalar va eksport nazorati, iqtisodiyot va energetika sohalarida yordam, shuningdek, gumanitar yordam masalalarini muhokama qiladi.
Zelenskiyning o‘zi ham AQSHga tashrifini rasman tasdiqladi. U safardan maqsad — Ukrainaning barqarorligini va mudofaa qobiliyatini mustahkamlashdan iborat ekanini yozgan. Politico nashri Ukraina delegatsiyasi 21-dekabr kuni bo‘lib o‘tadigan tashrif davomida AQSHdan ATACMS va Grey Eagle ta’minotini so‘rashini xabar qilgan.
Biroq ayni paytda AQSH rasmiylari Ukrainani bunday qurol-yarog‘ bilan ta’minlashga rozi emas.
“Bayden Oq uyi ATACMS yuborishni qat‘iyan rad etdi. Xarajatlar katta”, — degan AQSH rasmiylari.
Bayden ma’muriyatining fikricha, Kiyevga uzoq masofali raketalarni yuborish Putinni yanada halokatli qurollardan foydalanishga undashi mumkin.
Izoh (0)