Rossiya maxsus xizmatlari Ukraina razvedka rahbari Kirill Budanov va mudofaa vaziri Aleksey Reznikovga suiqasd uyushtirishga tayyorgarlik ko‘rgan. Bu haqda Ukraina xavfsizlik xizmati rahbari Vasiliy Malyuk 1+1 telekanaliga bergan intervyusida ma’lum qildi.
Malyukning so‘zlariga ko‘ra, Rossiya Ukrainaning yuqori martabali amaldorlarini yo‘q qilmoqchi va bu boradagi ishlar davom etmoqda.
“Biz hamma narsani ochiqlamaymiz, chunki ular sharmandali amaliyotidan saboq oladi. Ular nafaqat men uchun, balki mamlakatimizdagi ko‘plab yuqori lavozimli amaldorlar uchun ishlaydi. Nisbatan yaqinda akam Kirill Budanov va mudofaa vaziri Reznikovga suiqasd uyushtirildi”, — dedi Malyuk.
Ukraina xavfsizlik xizmati rahbari Rossiya suiqasdni bajarishi kerak bo‘lgan ijrochini yuborganini aytdi. Malyuk ijrochini Ukrainaga uchinchi davlat orqali kirmoqchi bo‘lganida qo‘lga olinganini ta’kidladi. Bundan tashqari, Rossiya ukrainalik harbiyni yo‘q qilish uchun 100 ming dollar to‘lagani aytilmoqda.
The Wall Street Journal gazetasi 16-dekabr kuni maqola chiqardi, unda Ukraina maxsus xizmatlariga tayanib, Putin Checheniston rahbariga Kiyevda hukumat binolari joylashgan dahani egallab olib, Zelenskiyni o‘ldirishni buyurgani haqida yozdi. Rossiya prezidenti matbuot kotibi Dmitriy Peskov ushbu ma’lumotlarni safsata deb atagandi.
25-fevral kuni, Ukrainada jangovar harakatlar boshlanganidan keyin bir kun o‘tib, Vladimir Zelenskiy Rossiya unga nisbatan suiqasd tayyorlayotganini va uni “birinchi raqamli nishon” deb hisoblashini aytgandi. O‘sha kuniyoq Dmitriy Peskov Rossiya Vladimir Zelenskiyni Ukraina prezidenti deb tan olishini ma’lum qildi.
Izoh (0)