Shoygu armiyaga chaqiruv yoshini 18 dan 21 yoshgacha oshirishni taklif qildi (video)

Rossiya Mudofaa vaziri Sergey Shoygu harbiy xizmat uchun yosh chegarasini bosqichma-bosqich oshirishni taklif qildi. Bu haqda “Kommersant” xabar berdi.

U harbiy xizmatga qabul qilishni 18 yoshdan 21 yoshgacha, yosh chegarasini esa 27 yoshdan 30 yoshgacha oshirishni ilgari surdi.

“Rossiya qurolli kuchlari sonini 1,5 million kishiga, shu jumladan, 670 ming kontrakt askariga yetkazish kerak. Ixtiyoriy ravishda shartnoma tuzishni xohlovchilarga xizmatning birinchi kunidan boshlab bu imkoniyat berilishi kerak”, — deydi Shoygu.

Shuningdek, u yana bir qancha takliflar ham bildirdi. Jumladan, u qurolli kuchlarning ikkita o‘ziga xos strategik hududiy birlashmalarini — Moskva va Leningrad harbiy okruglarini yaratishni yoqladi.

“NATOning Rossiya chegaralari yaqinida harbiy salohiyatni oshirish istagini hisobga olib, mamlakat shimoli-g‘arbida qo‘shinlar guruhini yaratish choralarini ko‘rish zarur”, — deydi vazir.

20-dekabr kuni Britaniya razvedkasi Ukrainadagi qator harbiy muvaffaqiyatsizlik sababli Putin o‘zini javobgarlikdan soqit qilishga urinayotganini ma’lum qilgandi. Vazirlik bunga Ukrainaga bostirib kirishda mas’ul bo‘lgan birlashgan shtabning yaqinda o‘tkazilgan yig‘ilishini misol qilib keltirgan.

Xususan, Putin Rossiya oliy harbiy rahbariyati, jumladan, mudofaa vaziri Sergey Shoygu va Rossiyaning Ukrainadagi qo‘shma kuchlari guruhi qo‘mondoni Sergey Surovikin bilan uchrashgandi. Uchrashuvda Kreml rahbari keyingi jangovar harakatlar strategiyasiga o‘zgartirish kiritishni taklif qilgan. Britaniya razvedkachilarining fikricha, bu Putinni Rossiya Qurolli kuchlarining Ukrainadagi qator harbiy muvaffaqiyatsizliklari uchun javobgarlikdan soqit qilishga qaratilgan.