Misrda Grand Egyptian Museum (Buyuk Misr muzeyi) ochilishi 2023-yilga qoldirildi. Shu bilan birga, muzey allaqachon ilk mehmonlarni qabul qilmoqda va rasmiy ochilishga qadar kichik guruhlar hamda ayrim biznes va madaniy tadbirlari uchun ochiq bo‘ladi.
Grand Egyptian Museum Misrning Giza piramidalaridan ikki kilometr uzoqlikda joylashgan. Muzey majmuasi 500 000 kvadrat metr maydonni egallaydi. Bu yerda Misr qadimiy buyumlarining dunyodagi eng katta va to‘liq to‘plamini — 100 mingga yaqin turli eksponatlarni tomosha qilish mumkin, ularning aksariyati ilgari hech qachon namoyish etilmagan.
Oltita asosiy galereyadan tashqari, yangi majmua ikkita vaqtinchalik ko‘rgazma zali, bolalar muzeyi, kutubxona, kinoteatr, bal zali, konferensiya markazi, ma’muriy idoralar, restoran va kafelar, do‘konlar va 110 000 kvadrat metrdan ortiq maydonni o‘z ichiga oladigan bog‘lardan iborat bo‘ladi.
Muzey kolleksiyasining asosiy marvaridlari — fir’avn Tutanxamon qabriga oid 5000 ga yaqin buyum bo‘lib, ular qabr Govard Karter tomonidan 1922-yilda topilganidan beri birinchi marta namoyish etiladi. Oltin niqoblar, sarkofaglar, oltin karovat va aravalar, qimmatbaho toshlar bilan bezatilgan marvarid taqinchoqlar: fir’avnning xazinalari birinchi marta bunday miqyosda ommaga ko‘rsatiladi.
Shuningdek, GEM ko‘rgazmasida fir’avn Xufuga tegishli ekani aytiladigan mashhur “quyosh qayig‘i” namoyish etiladi. Uning uzunligi 42 metr, yoshi 4600 da va u dunyodagi eng katta yog‘och kema hisoblanadi.
Eslatib o‘tamiz, GEM muzeyining dastlabki taxminiy qiymati 550 million dollarni tashkil qilgan. Mamlakatdagi inqilobiy o‘zgarishlar tufayli loyiha budjeti sezilarli darajada o‘sdi va 1 milliard dollarga yetdi.
Izoh (0)