Мисрда Grand Egyptian Museum (Буюк Миср музейи) очилиши 2023 йилга қолдирилди. Шу билан бирга, музей аллақачон илк меҳмонларни қабул қилмоқда ва расмий очилишга қадар кичик гуруҳлар ҳамда айрим бизнес ва маданий тадбирлари учун очиқ бўлади.
Grand Egyptian Museum Мисрнинг Гиза пирамидаларидан икки километр узоқликда жойлашган. Музей мажмуаси 500 000 квадрат метр майдонни эгаллайди. Бу ерда Миср қадимий буюмларининг дунёдаги энг катта ва тўлиқ тўпламини — 100 мингга яқин турли экспонатларни томоша қилиш мумкин, уларнинг аксарияти илгари ҳеч қачон намойиш этилмаган.
Олтита асосий галереядан ташқари, янги мажмуа иккита вақтинчалик кўргазма зали, болалар музейи, кутубхона, кинотеатр, бал зали, конференция маркази, маъмурий идоралар, ресторан ва кафелар, дўконлар ва 110 000 квадрат метрдан ортиқ майдонни ўз ичига оладиган боғлардан иборат бўлади.
Музей коллекциясининг асосий марваридлари — фиръавн Тутанхамон қабрига оид 5000 га яқин буюм бўлиб, улар қабр Говард Картер томонидан 1922 йилда топилганидан бери биринчи марта намойиш этилади. Олтин ниқоблар, саркофаглар, олтин кароват ва аравалар, қимматбаҳо тошлар билан безатилган марварид тақинчоқлар: фиръавннинг хазиналари биринчи марта бундай миқёсда оммага кўрсатилади.
Шунингдек, GEM кўргазмасида фиръавн Хуфуга тегишли экани айтиладиган машҳур «қуёш қайиғи» намойиш этилади. Унинг узунлиги 42 метр, ёши 4600 да ва у дунёдаги энг катта ёғоч кема ҳисобланади.
Эслатиб ўтамиз, GEM музейининг дастлабки тахминий қиймати 550 миллион долларни ташкил қилган. Мамлакатдаги инқилобий ўзгаришлар туфайли лойиҳа бюджети сезиларли даражада ўсди ва 1 миллиард долларга етди.
Изоҳ (0)