Rossiya yuzlab dronlar evaziga Eronga ilg‘or harbiy qismlar yetkazib berishni rejalashtirgan. Bu haqda Buyuk Britaniya mudofaa vaziri Ben Uollesga tayanib, Reuters xabar berdi.
Ben Uolles G‘arbni Rossiya va Eron o‘rtasidagi oldi-sotdi ishlarini fosh qilish uchun ko‘proq harakat qilishga chaqirdi.
“Eron Rossiyaning asosiy harbiy homiylaridan biriga aylandi. 300 dan ortiq kamikadze dronlarini yetkazib berish evaziga Rossiya endilikda Eronni ham Yaqin Sharq, ham xalqaro xavfsizlikka putur yetkazuvchi ilg‘or harbiy komponentlar bilan ta’minlash niyatida. Biz bu kelishuvni fosh qilishimiz kerak. Aslida buni men hozir ochiqladim”, — dedi u.
Uolles Rossiya Eronga yetkazmoqchi bo‘lgan harbiy qismlarning turlari haqida batafsil ma’lumot bermadi.
Rossiya va Eronning harbiy sohadagi hamkorligi
Buyuk Britaniya Mudofaa vazirligi razvedka ma’lumotiga ko‘ra, Rossiya yaqin oylarda Erondan yuzlab ballistik raketalarni olishi mumkin.
NBC nashri Oq uy vakiliga tayanib, Rossiya Eronga “misli ko‘rilmagan darajada” harbiy va texnik yordam ko‘rsatayotganini xabar berdi. Kengaytirilgan hamkorlik doirasida Rossiya Eronga zamonaviy harbiy texnika va butlovchi qismlar, jumladan, vertolyotlar (xususan, Su-35 qiruvchi samolyotlari) va havo hujumidan mudofaa tizimlarini yetkazib berishi mumkin.
Bir kun oldin AQSH BMT bosh kotibi Antoniu Guterrishni Rossiya tahdidlariga ko‘nganlikda va Rossiyaning Eron tomonidan yetkazib berilgan uchuvchisiz uchoqlardan foydalanishini tekshirish uchun rasmiylar yubormaganlikda ayblagandi.
Ma’lumotlarga ko‘ra, Rossiya Ukrainadagi urushda Eronda ishlab chiqarilgan Shahed-131 va Shahed-136 dronlaridan foydalanmoqda, Rossiya Qurolli kuchlari ularning nomini “Geran-1” va “Geran-2” deb o‘zgartirib olgan. Rossiya rasmiylari dronlarning Erondan olib kelinishini tan olmayapti.
Noyabr oyi boshida Eron tashqi ishlar vaziri Husayn Abdullohian Rossiyaga bir qancha dronlar yuborilganini tasdiqlab, bu urush boshlanishidan bir necha oy oldin sodir bo‘lganini aytdi.
Mavzuga doir:
Izoh (0)