Gruziya hukumati Ukrainaga gumanitar yordam sifatida jo‘natish uchun elektr generatorlarini sotib olishni boshladi. Bu haqda Gruziya Iqtisodiyot vazirligi rahbari Levan Davitashvili ma’lum qildi.
“Mavjud ma’lumotlarga ko‘ra, xarid jarayoni allaqachon olib borilmoqda, yil oxirigacha ular (generatorlar) Gruziyadan jo‘natiladi”, — dedi Davitashvili. Uning so‘zlariga ko‘ra, generatorlar turli quvvatda bo‘ladi, shuning uchun ular turar joy binolari uchun ham, korpus bloklari uchun ham “imkon qadar moslashadi”.
Dekabr oyi boshida Ukrainaning Gruziyadagi muvaqqat ishlar vakili Andrey Kasyanov Kiyev Tbilisidan bir necha bor harbiy yoki ham harbiy ham fuqarolik maqsadlari uchun texnika so‘raganini, biroq murojaatlar e’tiborga olinmaganini aytgandi. Diplomatning qayd etishicha, Ukraina Gruziyadan elektr generatorlarini ham so‘ragan.
“Gruziya orzusi – demokratik Gruziya” hukmron partiyasi rahbari Irakliy Kobaxidze bunga javoban Gruziya Ukrainaga generatorlar yetkazib berolmasligini, chunki respublikada bunday qurilmalar yo‘qligini aytgan. Bir necha kundan keyin hukumat bosh vazir Irakliy Gariboshvilining topshirig‘iga binoan Iqtisodiyot vazirligi Ukrainaga jo‘natish uchun elektr generatorlarini chetdan sotib olishini e’lon qildi. Gruziya hukumati buning uchun 1,5 million lari (taxminan 560 ming dollar) ajratdi.
Izoh (0)