Ukraina Qurolli kuchlari xodimi, A.Drones loyihasi asoschisi Yuriy Kasyanov frontdagi vaziyatga sifat jihatidan ta’sir ko‘rsatishda qanday turdagi dronlar yordam berishini aytdi.
Kasyanovning fikricha, urushning kechishi dronlar tufayli o‘zgargan. Aviatexnika qurollar, dori-darmonlarni yetkazib berishda, artilleriyani boshqarishda, razvedkada, vaqtni tejashda ahamiyatli. Ekspert 7 million dollarlik Bayraktar kabi qimmat hamda yirik dronlar bir martalik vazifalarni bajarish uchun mos emasligini qayd etadi. U frontda arzon va ko‘p sonli dronlardan foydalanish kerakligini ta‘kidladi.
“Frontda dronlar va kopterlarning keskin tanqisligi mavjud. 200-300 baravar past narxli aviatexnikalar zarur, o‘ta qimmat va murakkab uskunalarni sotib olish urushda g‘alaba qozonishimizga yordam bermaydi”, — deydi u.
Kasyanov harbiy va huquq-tartibot idoralarini jangovar dronlarga haddan tashqari talab qo‘yganlikda ayblagan. Uning fikricha, Ukrainada urushda yo‘qolgan dronlarni qoplash uchun vaqt yo‘q, shu uchun ko‘ngillilar va davlatning sa’y-harakatlariga qaramay, dronlar doimo yetishmaydi.
“Davlat, harbiy idora, yirik ko‘ngillilar jamg‘armasi butunlay boshqacha siyosatga amal qiladi. Ular eng qimmat, eng ‘samarador’, ‘eng zo‘r’ dronlarni reklama qiladi, sotib oladi, foydalanishga topshiradi. Bunday qurilmalar arzon, oddiy va ishlatish uchun qulay bo‘lgan dronlar bilan taqqoslaganda murakkab tuzilgan. Ideal dronning 90 foiz narxiga 10 ta qurilma sotib olish mumkin. Ammo bitta ‘ideal’ dron sotib olinadi”, — deydi ekspert.
Kasyanov Ukraina o‘zining arzon, ishonchli va ko‘p miqdorda Shahed’larini ishlab chiqarishi kerak. Rossiya qurolli kuchlari Eron dronlaridan ommaviy foydalana boshlagandan so‘ng, frontda vaziyatni o‘zgartirish uchun bunday uskunalar juda ko‘p kerak bo‘ladi.
“Bizga nisbatan arzon, tasdiqlangan va ommaviy ishlab chiqarilgan dronlar kerak. Razvedka, hujum funksiyalarni bajarsin, Ukrainada ishlab chiqarilgan bo‘lsin”, — deya xulosa qildi u.
Mavzuga doir:
Izoh (0)