Rossiya Erondan Shahed-136 kamikadze dronlarining yangi partiyasini olgan. Bu haqda Ukraina Mudofaa vazirligi razvedka bosh boshqarmasi vakili Andrey Yusov ma’lum qildi.
Shu bilan birga, Rossiyaning 16-dekabr kuni Ukrainaga uyushtirgan hujumi chog‘ida bu dronlardan foydalanilmagan. Yusovning so‘zlariga ko‘ra, Eron tomonidan taqdim etilgan kamikadze dronlarning navbatdagi partiyasi avvalgilariga qaraganda kamroq, shu bois rossiyaliklar endi bu dronlardan avaylab foydalanmoqda.
“Bu yangi partiya, lekin Shahed’larning dastlabki ommaviy ishlatilishi bilan qiyoslaganda, u aniq kamroq. Hozir ularning soni bo‘yicha fikr bildirmaymiz, lekin kechagi yirik raketa zarbalari paytida Shahed’lardan foydalanilmaganini ko‘rmoqdamiz. Boshqa barcha vositalar, barcha raketa qurollari qo‘llanildi”, — dedi Yusov.
19-dekabrga o‘tar kechasi esa Rossiya ushbu kamikadze dronlari bilan Kiyevga zarbalar berdi.
Ma’lumotlarga ko‘ra, Rossiya Ukrainadagi urushda Eronda ishlab chiqarilgan Shahed-131 va Shahed-136 dronlaridan foydalanmoqda, Rossiya Qurolli kuchlari ularning nomini “Geran-1” va “Geran-2” deb o‘zgartirib olgan. Rossiya rasmiylari dronlarning Erondan olib kelinishini tan olmayapti.
Noyabr oyi boshida Eron tashqi ishlar vaziri Husayn Abdullohian Rossiyaga bir qancha dronlar yuborilganini tasdiqlab, bu urush boshlanishidan bir necha oy oldin sodir bo‘lganini aytdi.
13-dekabr kuni Eron mudofaa vaziri Muhammad-Rizo Ashtianiy Kiyev urush paytida Eron qurollaridan foydalanilayotgani haqida birorta dalil keltirmaganini da’vo qildi. Vazirning aytishicha, Ukraina va Eron harbiylari o‘rtasida uchrashuv bo‘lib o‘tgan, unda Ukraina tomoni Eronning Rossiyaga dronlar yetkazib berayotgani, ulardan Ukraina shaharlariga hujumda foydalanilayotganini tasdiqlovchi hech qanday hujjat taqdim etmagan.
Izoh (0)