Россия юзлаб дронлар эвазига Эронга илғор ҳарбий қисмлар етказиб беришни режалаштирган. Бу ҳақда Буюк Британия мудофаа вазири Бен Уоллесга таяниб, Reuters хабар берди.
Бен Уоллес Ғарбни Россия ва Эрон ўртасидаги олди-сотди ишларини фош қилиш учун кўпроқ ҳаракат қилишга чақирди.
«Эрон Россиянинг асосий ҳарбий ҳомийларидан бирига айланди. 300 дан ортиқ камикадзе дронларини етказиб бериш эвазига Россия эндиликда Эронни ҳам Яқин Шарқ, ҳам халқаро хавфсизликка путур етказувчи илғор ҳарбий компонентлар билан таъминлаш ниятида. Биз бу келишувни фош қилишимиз керак. Аслида буни мен ҳозир очиқладим», — деди у.
Уоллес Россия Эронга етказмоқчи бўлган ҳарбий қисмларнинг турлари ҳақида батафсил маълумот бермади.
Россия ва Эроннинг ҳарбий соҳадаги ҳамкорлиги
Буюк Британия Мудофаа вазирлиги разведка маълумотига кўра, Россия яқин ойларда Эрондан юзлаб баллистик ракеталарни олиши мумкин.
NBC нашри Оқ уй вакилига таяниб, Россия Эронга «мисли кўрилмаган даражада» ҳарбий ва техник ёрдам кўрсатаётганини хабар берди. Кенгайтирилган ҳамкорлик доирасида Россия Эронга замонавий ҳарбий техника ва бутловчи қисмлар, жумладан, вертолётлар (хусусан, Су-35 қирувчи самолётлари) ва ҳаво ҳужумидан мудофаа тизимларини етказиб бериши мумкин.
Бир кун олдин АҚШ БМТ бош котиби Антониу Гутерришни Россия таҳдидларига кўнганликда ва Россиянинг Эрон томонидан етказиб берилган учувчисиз учоқлардан фойдаланишини текшириш учун расмийлар юбормаганликда айблаганди.
Маълумотларга кўра, Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.
Ноябрь ойи бошида Эрон ташқи ишлар вазири Ҳусайн Абдуллоҳиан Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
Мавзуга доир:
Изоҳ (0)