Yevropa Ittifoqining (YI) 15-dekabr kungi sammitida Bosniya va Gersegovinaga YI a’zoligiga nomzod maqomi berilishi ma’qullandi. Bu haqda Yevropaning kengayish va yaxshi qo‘shnichilik siyosati bo‘yicha komissari Oliver Varxeli Twitter’da ma’lum qildi.
“Men Yevropa kengashining Bosniya va Gersegovinaga nomzod maqomini berish haqidagi qarorini olqishlayman”, — deydi Oliver Varxeli.
Mamlakat YI a’zoligiga nomzod maqomini olgani haqidagi ma’lumotni Yevropa kengashi prezidenti vakili Barend Leyts ham tasdiqlagan.
“Bosniya va Gersegovina uchun nomzod maqomini berish to‘g‘risida qaror qabul qilindi”, — degan u tvitida.
13-dekabr kuni Yevropa Ittifoqi Bosniya va Gersegovinaga a’zolikka nomzod maqomini berishini xabar qilgan. YI vazirlari tegishli qarorni qo‘llab-quvvatlagan.
Bosniya va Gersegovina — janubi-sharqiy Yevropadagi davlat, Bolqon yarim orolida joylashgan. Shimol, g‘arb va janubda Xorvatiya, sharqda Serbiya, janubi-sharqda Chernogoriya bilan chegaradosh. Rasmiy tillari bosniya, serb va xorvat. Poytaxti — Sarayevo shahri. Mamlakat 2016-yilning fevral oyida Yevropa Ittifoqiga a’zo bo‘lish uchun ariza topshirgan.
14-dekabrda Kosovo prezidenti Yevropa Ittifoqiga qo‘shilishi haqidagi arizani imzolagandi, 15-dekabrda esa tegishli hujjat YIga topshirilgan.
Izoh (0)