“Daryo” nashri 15-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
AQSH Kiyevga o‘q-dorilarni “aqlli” bombaga aylantiradigan uskunalarni jo‘natmoqchi — WP
AQSH prezidenti ma’muriyati boshqarilmaydigan aviatsiya o‘q-dorilarini “aqlli” bombaga aylantiruvchi uskunani Ukrainaga yuborishni rejalashtirmoqda, deb yozadi The Washington Post Amerikaning yuqori martabali rasmiylariga tayanib.
Gazeta manbalariga ko‘ra, gap GPS Joint Direct Attack Munition (JDAM) texnologiyasiga asoslangan, turli xildagi qurollarga biriktirilishi mumkin bo‘lgan uskunalar to‘plami haqida ketmoqda. Avval AQSH armiyasi ushbu texnologiyani bombardimonchi va qiruvchi samolyotlarda qo‘llaniladigan bombalar uchun ishlatgan.
The Washington Post ta’kidlashicha, AQSH prezidenti Jo Bayden yoki uning milliy xavfsizlik bo‘yicha bosh maslahatchilaridan birortasi JDAM’ni Ukrainaga yuborish g‘oyasini ma’qullaganmi-yo‘qmi, hozircha noma’lum.
Si Szinpin Rossiya bilan munosabatlarni mustahkamlash haqida buyruq bergan — WSJ
Xitoy yetakchisi Si Szinpin jamoatchilik maydonida Rossiyadan “uzoqlashish”ga urinayotganiga qaramay, hukumatga Moskva bilan yaqinroq iqtisodiy aloqalar o‘rnatish bo‘yicha ko‘rsatma bergan. Bu haqda The Wall Street Journal “Pekin siyosiy maslahatchilari”ga tayanib xabar bermoqda.
Nashr manbalariga ko‘ra, Xitoy va Rossiya o‘rtasidagi iqtisodiy aloqalarni kengaytirish rejasi Rossiyadan neft, gaz va qishloq xo‘jaligi mahsulotlari importini oshirishni o‘z ichiga oladi.
Bundan tashqari, Pekin Arktikada Moskva bilan energetika sohasidagi hamkorlikni kengaytirish, shuningdek, Rossiya infratuzilmasiga, xususan, temiryo‘l va portlarga sarmoya kiritishni ko‘paytirish niyatida.
Rossiyaning Ukrainadagi bosqini boshlanganidan keyin Xitoy Moskvaga qarshi sanksiyalar kiritmadi va G‘arb davlatlarining bunday choralarini qoraladi.
Ilon Mask uning samolyotini kuzatgan Twitter foydalanuvchisini sudga berdi, u Bill Geyts va Putinning parvozlarini ham kuzatib borgan
Twitter ijtimoiy tarmog‘i egasi, Tesla va SpaceX asoschisi Ilon Mask @ElonJet Twitter-akkaunti egasi, 20 yoshli Jek Suinini sudga berganini ma’lum qildi. U biznesmen samolyotining harakatlari haqida axborot e’lon qilgan.
Maskning so‘zlariga ko‘ra, yaqinda Los-Anjelesda bo‘lib o‘tgan voqeadan keyin u sudga murojaat qilgan. U yerda “aqldan ozgan stalker” biznesmenning o‘g‘lini biroz vaqt davomida ta’qib qilgan — uni Ilon Mask deb o‘ylagan.
Hodisadan keyin Mask Twitter’da foydalanuvchilarning joylashgan joyi haqida real vaqt rejimida ma’lumot beruvchi har qanday hisob yopib qo‘yilishini, chunki bu odamlarning jismoniy xavfsizligiga tahdid solishini ma’lum qildi.
Mask sudlashmoqchi bo‘layotgan Jek Suinining o‘zi BBC News’ga ma’lum qilishicha, uning biznesmenning o‘g‘li bilan yuz bergan voqeaga aloqasi yo‘q.BBC News yozishicha, Suini Microsoft ta’sischialridan biri Bill Geyts, Amazon asoschisi Jeff Bezos va Meta bosh direktori Mark Sukerberg kabi mashhurlarning parvozlarini kuzatib borgan boshqa o‘nlab akkauntlarga ham mas’ul bo‘lgan.
Bundan tashqari, Suini Rossiya prezidenti Vladimir Putin uchgan ehtimoliy samolyotlarni ham kuzatgan. Bu akkauntlarning aksariyati ham bloklab qo‘yilgan.
O‘zbekistonliklar dam olish uchun eng ko‘p qayerga borayotgani ma’lum qilindi
Davlat statistika qo‘mitasi ma’lumotlariga ko‘ra, 2022-yilning 10 oyida 558,6 ming nafar O‘zbekiston fuqarosi dam olish va hordiq chiqarish uchun xorijga chiqdi. Va sayohatlarning eng ko‘p qismi ya’ni 200 mingdan ortiq nafari Turkiya davlatiga to‘g’ri kelmoqda.
Ayni vaziyatda O‘zbekistonning Istanbul shahridagi bosh konsulxonasi Turkiyada istiqomat qilayotgan o‘zbekistonlikga ogohlantirish bilan chiqdi.
“Hurmatli vatandoshlar! Shaxsiy havfsizligingizga e’tiborli bo‘lgan holda sizlardan turli xildagi ko‘psonlik yig‘ilish va namoyishlarda ishtirok etmaslik hamda ularda qatnashishga da’vat etish orqali targ‘ibot yuritmaslikka chaqirib, bunday harakatlar qonuniy javobgarlikka tortilishga sabab bo‘lishi haqida ogohlantiramiz”, — deyiladi bosh konsulxona matbuot xizmati tomonidan e’lon qilingan ogohlantirishda.
Izoh (0)