Namanganlik deputat Muzaffar Jamoliddinovning Facebook’dagi sahifasiga joylangan hamda elektr va gazdan shikoyat qilganlarga “issiq va yorug‘ kameralar” haqida eslatilgan posti ijtimoiy tarmoqlarda keskin e’tirozlarga sabab bo‘ldi. Post keyinchalik o‘chirib tashlangan bo‘lsa ham, uning atrofidagi bahs-munozaralar hali tinganicha yo‘q. “Daryo” muxbiri Azizbek Abduvaliyev deputat bilan uchrashib, mazkur chiqishdan ko‘zlangan maqsad-muddao haqida so‘radi.
“Postimga shunchalik e’tibor qaratilishini o‘zim ham kutmagandim”
Bundan 5 yil avval, 2017-yili 10 oy davomida qamoq ehtiyot chorasida saqlanganman. Sud tugaganidan so‘ng ozodlikka chiqqanman va keyinchalik sudlanganlik holati olib tashlangan. Shundan kelib chiqib, hayotda elektr va gaz tanqisligidan tashqari boshqa tashvishlar ham borligi, ularning oldida bu muammolar u qadar ahamiyatli emasligini nazarda tutib, post qo‘ygandim. Lekin barcha ham meni tanimasligi, o‘tmishimdan xabardor emasligi, boshqacha tushunishlari mumkinligini o‘ylab ko‘rmagan ekanman.
Postni kechki payt joylagandim, charchagan ekanman, ko‘zim ilinibdi. Oradan ikki-uch soat o‘tib qarasam, postning ostida 1,5 mingdan ortiq izoh turibdi. Ularning aksariyati o‘ta salbiy edi. To‘g‘risi, buni o‘zim ham kutmagandim — shuncha odam meni kuzatishi, fikrimga munosabat bildirishini. Shundan so‘ng bu postni o‘chirib tashladim va keyinroq asl maqsadim bayon qilingan ikkinchi postni joyladim. Lekin unga deyarli hech kim e’tibor bermadi, tushunishni ham istamadi. Birgina “Daryo” nashrida ushbu izoh chop etildi, buning uchun tahririyatdan minnatdorman.
“Deputatlik so‘rovlarimning katta qismi aynan gaz, elektr, suv va yo‘l muammolariga tegishli”
Ko‘pchilik fikrlarimni ochiqdan ochiq tahdid sifatida qabul qilibdi. Bunga vakolatli shaxs, ya’ni jazolovchi organ odami bo‘lmasam, qanday qilib kimnidir qo‘rqitishim mumkin? Deputat o‘zi asli xalq vakili bo‘lsa. Deputatlik faoliyatim davomida 16 nafar fuqaroga nisbatan qo‘zg‘atilgan jinoyat ishlarida jamoatchilik himoyachisi bo‘lib ishtirok etgan ekanman. Ulardan 6 nafarini kafilligimga olganman. Ularga qamoq bilan bog‘liq bo‘lmagan jazo tayinlash haqida sudlarga kiritgan iltimosnomalarim qanoatlantirilib, o‘sha fuqarolar hozir ochiqda, ishlab, o‘qib yuribdi.
Deputatlik davrimda, ya’ni 2019-yildan beri turli idora va tashkilotlarga 19 ta deputatlik so‘rovi, 32 ta murojaat yo‘llabman. Ular orasida aynan o‘sha gaz, elektr, suv va yo‘l muammolari bor.
Viloyatda yo‘l uchun ajratilgan mablag‘ning katta qismi deputatlik hududimga to‘g‘ri kelar ekan. Ikkita mahallani o‘zida 17 kilometr asfalt bo‘libdi. To‘g‘ri, bular davlat mablag‘i bilan bo‘ladi, lekin buning ortidan kimdir yelib-yugurishi, dasturlarga kiritish uchun jon kuydirishi kerak-ku?
“Kimgadir maddohlik qilishga ehtiyojim yo‘q”
Ayrim izohlarda meni “maddoh” deb atashibdi. Kimgadir maddohlik qilishga ehtiyojim yo‘q, chunki tadbirkorlik bilan shug‘ullanganman, mablag‘im yetarli. Poligrafiya va darvoza tayyorlash korxonalarimiz bor, qo‘l ostimizda 50 nafardan ortiq odam ishlaydi. Aslida javobgarlikka tortilishimga ham shu tadbirkorlik faoliyati sabab bo‘lgan. Ochig‘ini aytaman, 5-6 yil avval hozirgi insonparvarlik siyosati va tadbirkorlarga ijobiy munosabat bo‘lganida bunday qora kunlar boshimga tushmasdi ham. Ota-onam, oilamni haqorat qilishibdi. Ularda nima ayb? Ota-onam men va ukalarimni el koriga yaraydigan insonlar etib voyaga yetkazishga harakat qilishgan, biz bilan doim faxrlanishni istashadi.
“Boshimdan o‘tganlari katta saboq bo‘ldi”
Asosiy xulosa shuki, nafaqat deputat, balki har qanday odam chiqishlariga, ijtimoiy tarmoqlarda joylayotgan postlariga e’tiborliroq bo‘lishi kerak ekan. Shaxsiy hayotidagi muammolarni xalq tashvishi bilan aralashtirmasligi va bu orqali ommaning g‘azab-nafratini qo‘zg‘atmasligi kerak ekan. So‘zlarimni noto‘g‘ri tushungan barchadan buning uchun yana bir bor uzr so‘rayman.
Boshimdan o‘tganlari men uchun katta saboq bo‘ldi. O‘zim qo‘ygan post ortidan yuzaga kelgan talqin va tanqidlarni muhokama qilib o‘tirmasdan, deputatlik vakolatimni muddatidan avval tugatish haqida ariza berdim. Endi uni ko‘rib chiqish kengashga havola.
Mavzuga doir: Elektr va gazdan shikoyat qilgan fuqarolarni qamoq bilan “ogohlantirgan” deputat o‘z xohishiga ko‘ra ariza yozdi
Izoh (0)